တနင်္သာရီတိုင်း၊ ထားဝယ်အကျဥ်းထောင်ကနေ နိုင်ငံရေးအကျဥ်သား ၁၄ ဦး အပါအဝင် အယောက် ၂၀ နီးပါး အောက်တိုဘာ ၂ ရက် မနက်က ပြန်လွတ်လာတယ်လို့ ထားဝယ်နိုင်ငံရေးအကျဥ်းသားများကွန်ရက် (DPPN) နဲ့ နိုင်ငံရေးအကျဥ်သား မိသားစုဝင်တွေဆီက သိရပါတယ်။

ပြန်လွတ်လာတဲ့ နိုင်ငံရေးအကျဥ်သားတွေကတော့ ထားဝယ်တက္ကသိုလ် ကျောင်းသားများသမဂ္ဂရဲ့ ဥက္ကဋ္ဌဟောင်း ကိုအောင်ဝေယံကျော်၊ ကိုမောင်တူး၊ ကိုအောင်သူရဇော်၊ ကိုဝေယံဌေး၊ ကိုကျော်မင်းဦး၊ ကိုဇေမြတ်ဦး၊ ကိုကိုလင်းနိုင်၊ ကိုဝင်းလတ်ထွေး၊ ကိုဥက္ကာရှိုင်းအောင်၊ ကိုဝေယံထက်နဲ့ ကိုရဲထွန်း တို့ကိုသာ အမည်အတည်ပြုနိုင်ပြီး ကျန် ၃ ဦးကို အတည်ပြုနေဆဲပဲလို့ DPPN က ထုတ်ပြန်ထားပါတယ်။

လွတ်မြောက်လာတဲ့ နိုင်ငံရေးအကျဥ်သားတဦးရဲ့ မိတ်ဆွေတဦးက “၂၀၂၁ မေလ ၁၈ ရက်က အဖမ်းခံရတဲ့ အမှုတွဲတခုလုံးက ၉ ယောက်နဲ့ တခြားလူတွေ လွတ်ရက်စေ့ပြီး လွတ်လာတာပါ။ အဲဒီအမှုတွဲက စုစုပေါင်းက ၄ နှစ်စီကျတယ်။ လျှော့ရက်၊ ချုပ်ရက်တွေ နုတ်လိုက်ရင်တော့ ရက်စေ့သွားတဲ့ သဘောပေါ့” လို့ ပြောပါတယ်။

အခြားလွတ်မြောက်လာသူ ၅ ဦးကတော့ မူးယစ်ဆေးဝါးအမှုတွေ ဖြစ်တယ်လို့ သိရပါတယ်။

ကိုအောင်ဝေယံကျော် အပါအဝင် အမျိုးသား ၁၀ ဦးကို ၂၀၂၁ ခု မေ ၁၈ ရက်က ထားဝယ်မြို့၊ ဝဲကျွန်းရပ်ကွက်ရှိ နေအိမ်တလုံးမှာ စစ်ကောင်စီတပ်က ဝင်ရောက်ဖမ်းဆီးခဲ့တာပါ။ 

အဲဒီထဲက ၁ ဦးကို အသက်မပြည့်သေးတဲ့အတွက် ပြန်လွှတ်ပြီး ကျန် ၉ ဦးကို ပုဒ်မ၅၀၅ (က) နဲ့ ၁၉ (စ) တွေနဲ့အမှုဖွင့်ပြီး ဇွန်လ ၂၁ ရက်က ထောင်ဒဏ် ၄ နှစ်စီ ချမှတ်ခဲ့ပါတယ်။

ထားဝယ်အကျဥ်းထောင်မှာ အကျဥ်းသားအားလုံးရဲ့ ထက်ဝက်နီးပါးဟာ နိုင်ငံရေးအကျဥ်းသားတွေဖြစ်ပြီး ဩဂုတ်လက အကျဥ်းထောင်အရာရှိတွေ အရေးယူခံရမှုနဲ့ အရာရှိ အပြောင်းအလဲတွေကြောင့် ထောင်ဝင်စာတွေ့ရာမှာ ကန့်သတ်ချက်တွေ များလာနေတယ်လို့ နိုင်ငံရေးအကျဥ်းသား မိသားစုဝင်တွေက ပြောပါတယ်။