ဂျူဗင်တပ်အသင်းကို တရားစွဲရန် နောက်ခံလူ ဘိုနူချီ ဆုံးဖြတ်
DVB
·
September 15, 2023
အီတလီနောက်ခံလူ ဘိုနူချီဟာ အသင်းဟောင်းဂျူဗင်တပ်အသင်းကို တရားစွဲဆိုသွားဖို့ ဆုံးဖြတ် ထားပါတယ်။
သူဟာ အခုနှစ်နွေရာသီအပြောင်းအရွှေ့မှာ ဂျာမန်ကလပ် အူယွန်းဘာလင် အသင်းဆီကို ပြောင်းရွှေ့ကစားနေတာပါ။
အသင်းပြောင်းရွှေ့မှု မပြုလုပ်ခင်မှာ ဂျူဗင်တပ်အသင်းဘက်က အရှက်ရစေလောက်တဲ့အထိ ပြုမူခဲ့ကြောင်း ဘူနူချီက စွပ်စွဲခဲ့ပြီး အဲဒီအတွက် တရားစွဲဆိုသွားမှာဖြစ်ကြောင်း အတည်ပြုခဲ့တာပါ။
သူဟာ တူရင်ကလပ်အတွက် ၁၂ နှစ်ကြာ ကစားခဲ့သူဖြစ်ပြီး စီးရီးအေချန်ပီယံ ၈ ကြိမ်အထိရယူပေးခဲ့တာပါ။
အခုနှစ်ရာသီကြိုခြေစမ်းပွဲစဉ်တွေကစားစဉ်ကတည်းက နည်းပြ အယ်လီဂရီက လူစာရင်းကနေ ချန်လှပ်ခဲ့ပြီး အမေရိကခရီးစဉ်ကိုလည်း လိုက်ပါခွင့်မပေးခဲ့ပါဘူး။
အရာအားလုံးမှာ အရှက်ရစရာဖြစ်အောင် ဂျူဗင်တပ်အသင်းဘက်က ပြုမူဆက်ဆံခဲ့ပြီး အပြုံးနဲ့ လမ်းခွဲတာမျိုးမဖြစ်ခဲ့ကြောင်း ဘိုနူချီက ပြောသွားပါတယ်။
Photo-Reuters
