သြစတြေးလျ ကာကွယ်ရေးတပ်ဖွဲ့ (ADF) ရဟတ်ယာဉ်ဟာ ကွင်းစ်လန် ကမ်းလွန်ပင်လယ်ပြင်ထဲ ကို ပျက်ကျသွားပြီးနောက် အနည်းဆုံး လူ ၄ ယောက်သေဆုံးသွားနိုင်တာကို စိုးရိမ်နေရကြောင်း ကာကွယ်ရေးဝန်ကြီး ရစ်ချတ် မားလ်စ် က ဇူလိုင် ၂၉ ရက်မှာ ပြောပါတယ်။
ဒီရဟတ်ယာဉ်ဟာ အမေရိကန်နဲ့ သြစတြေးလျ ၂ နိုင်ငံအကြား အကြီးဆုံးပူးပေါင်းစစ်ရေး လေ့ကျင့်မှုဖြစ်တဲ့ ၂ နှစ်ကြာ တာလစ်မန် ဆေဘရယ် လေ့ကျင့်မှုမှာ ပါဝင်ခဲ့တာပါ။
ရဟတ်ယာဉ်ဟာ ဇူလိုင် ၂၈ ရက် ညနှောင်းပိုင်းက ဟာမီလ်တန်ကျွန်းအနီးရေပြင်မှာ နစ်မြုပ်သွားခဲ့တယ်လို့ ကာကွယ်ရေးဝန်ကြီး မားလ်စ်က သတင်းစာရှင်းလင်းပွဲမှာ ပြောပါတယ်။
“မနေ့ညက ဒေသစံတော်ချိန် ဆယ်နာရီခွဲလောက်မှာ သြစတြေးလျစစ်တပ် ရဟတ်ယာဉ် (MRH90) ဟာ ဟာမီလ်တန်ကျွန်းနားက ရေထဲမှာ နစ်မြုပ်သွားခဲ့ရပြီး ရဟတ်ယာဉ်အမှုထမ်း ၄ ယောက် လိုက်ပါသွားတယ်” လို့ မားလ်စ်က ပြောပါတယ်။
လေ့ကျင့်ရေးမှာပါဝင်ခဲ့တဲ့ တခြားရဟတ်ယာဉ်တစင်းနဲ့ ရှာဖွေကယ်ဆယ်ရေးတွေ လုပ်ဆောင်နေပြီး အခုပြောဆိုနေချိန်အထိ သူတို့ကိုမတွေ့ရသေးတာကြောင့် ရှာဖွေရေးတွေ ဆက်လက်လုပ်ဆောင် နေပါတယ်လို့လည်း သူက ဆိုပါတယ်။
ဒီဖြစ်ရပ်နဲ့ ပတ်သက်လို့ ယာဉ်အမှုထမ်း ၄ ဦးရဲ့ မိသားစုဝင်တွေကို အကြောင်းကြား ထားကြောင်းလည်း ပြောပါတယ်။
တာလစ်မန် ဆေဘရယ် စစ်ရေးလေ့ကျင့်မှုကိုလည်း ခေတ္တရပ်ထားပါတယ်။
Source-Reuters
