တရုတ်နိုင်ငံက အိမ်ရှင်အဖြစ် လက်ခံကျင်းပတဲ့ ၁၉ ကြိမ်မြောက် ဟန်ကျိုး အာရှအားကစားပြိုင်ပွဲ အမျိုးသားဘောလုံးပြိုင်ပွဲ မဲခွဲပွဲကို ဇူလိုင် ၂၇ ရက်က ပြုလုပ်ခဲ့ပြီး မြန်မာအသင်းဟာ အုပ်စု က မှာ အိမ်ရှင်တရုတ်၊ အိန္ဒိယ၊ ဘင်္ဂလားဒေ့ရှ်တို့နဲ့ တွေ့ဆုံနေပါတယ်။
အာရှအားကစားပြိုင်ပွဲကို စက်တင်ဘာ ၁၉ ရက်ကနေ အောက်တိုဘာ ၇ ရက်နေ့အထိ အသင်း ၂၃ သင်းနဲ့ အုပ်စု ၆ စုခွဲပြီး ယှဥ်ပြိုင်သွားမှာဖြစ်ပါတယ်။
အာရှအားကစားပြိုင်ပွဲ အုပ်စု ၆ ခုမှ ပထမနဲ့ ဒုတိယရတဲ့ ၁၂ သင်းအပြင် အကောင်းဆုံး တတိယ ၄ သင်းပါ ၁၆ သင်းဆင့်ကို တက်လှမ်းနိုင်မှာ ဖြစ်ပါတယ်။
အုပ်စုမဲခွဲမှုအရ အုပ်စု က မှာ တရုတ်၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ အုပ်စု ခ မှာ ဆော်ဒီအာရေဗျ၊ အီရန်၊ ဗီယက်နမ်၊ မွန်ဂိုလီးယား၊ အုပ်စု ဂ မှာ ဥဇဘက်ကစ္စတန်၊ ဆီးရီးယား၊ အာဖဂန်နစ္စတန်၊ ဟောင်ကောင်၊ အုပ်စု ဃ မှာ ဂျပန်၊ ကာတာ၊ ပါလက်စတိုင်း၊ အုပ်စု င မှာ တောင်ကိုရီးယား၊ ကူဝိတ်၊ ဘာရိန်း၊ ထိုင်း၊ အုပ်စု စ မှာ မြောက်ကိုရီးယား၊ အင်ဒိုနီးရှား၊ ကာဂျစ္စတန်၊ ထိုင်ဝမ်တို့ အသီးသီး တွေ့ဆုံနေပါတယ်။
မြန်မာအသင်းဟာ အာရှအားကစားပြိုင်ပွဲမှာ ရွှေတံဆိပ်ရဖူးတဲ့ တသင်းတည်းသော အရှေ့တောင်အာရှနိုင်ငံဖြစ်ပြီး ချန်ပီယံ ၂ ကြိမ် ဖြစ်ခဲ့ပါတယ်။
ဟန်ကျိုး အာရှအားကစားပြိုင်ပွဲ အမျိုးသမီးဘောလုံးပြိုင်ပွဲ အုပ်စုပွဲမှာ မြန်မာအမျိုးသမီးအသင်းဟာ အုပ်စု င မှာ တောင်ကိုရီးယား၊ ဟောင်ကောင်၊ ဖိလစ်ပိုင်တို့နဲ့ ကျရောက်နေပါတယ်။
