ရန်ကုန် မရမ်းကုန်းမြို့နယ်၊ ဥက္ကလာဂေါက်ကွင်းမီးပွိုင့်၊ ဝေဇယန္တာလမ်းနဲ့ ဂန္ဓမာလမ်းထောင့်မှာ ဇွန်လ ၂၄ ရက်၊ ညပိုင်းက ကား နှစ်စီး တိုက်မိတာကြောင့် လူ ၅ ဦး ထိခိုက်ဒဏ်ရာရရှိခဲ့တယ်လို့ မေတ္တာသီတာရေစင်အသင်းက ပြောပါတယ်။
အဲ့ဒီည ၉ နာရီ ၄၅ မိနစ်လောက်က လူ ၂ ဦးပါ အိမ်စီးကားနဲ့ လူ ၅ ဦးပါ ဟိုက်ဂျက်ကားတို့ ၂ စီး မီးပွိုင့်ဖြတ်မောင်းနေချိန် လမ်းအကွေ့မှာ ဝင်တိုက်မိကြတာပါ။
မေတ္တာသီတာရေစင်အသင်း တာဝန်ရှိသူတဦးက “ ဟိုက်ဂျက်နဲ့ အိမ်စီးကားနဲ့ တိုက်တာ၊ ဂန္ဓမာလမ်းထောင့်မှာပါ၊ ဂေါက်ကွင်းရှေ့တင် ဖြစ်တာ၊ ဟိုက်ဂျက်မှာပါတဲ့ ဒရိုင်ဘာရော လူ အားလုံးပေါင်း ၅ ဦး ထိသွားတယ်၊ ခြေထောက်တွေ ထိတယ်၊ ခေါင်းနဲ့ မျက်နှာတွေ ထိထားတယ်၊ အမျိုးသား ၃ ဦး အမျိုးသမီး ၂ ဦး၊ အမျိုးသမီး ၂ ဦးမှာ ကလေးတယောက် ပါတယ် ” လို့ ဆိုပါတယ်။
ယာဉ်တိုက်မှုအရှိန်ကြောင့် အိမ်စီးကား ရှေ့ခြမ်းတခုလုံး ပျက်စီးသွားပြီး ဟိုက်ဂျက်ကားရဲ့ ရှေ့မှန်၊ နောက်ဘက်အမိုးနဲ့ တံခါးတွေ ပျက်စီးသွားပါတယ်။
ဟိုက်ဂျက်ကားပေါ်ပါ အသက် ၃၀ ကျော်အရွယ် အမျိုးသား ၃ ဦး၊ အမျိုးသမီး ၁ ဦးနဲ့ ၅ နှစ်အရွယ် မိန်းကလေးတဦးတို့မှာ ဦးခေါင်းပေါက်ဒဏ်ရာ၊ ခြေထောက်ပြတ်ရှဒဏ်ရာ ရရှိသွားပြီး အိမ်စီးကားပေါ်က လူတွေတော့ ထိခိုက်မှု မရှိဘူးလို့ သိရပါတယ်။
ထိခိုက်ဒဏ်ရာရရှိသူတွေ ၅ ဦးကို မေတ္တာသီတာရေစင်အသင်းနဲ့ ကောင်းမှုဆောင်အသင်းတို့က လူနာတင်ယာဉ်တွေနဲ့ မြောက်ဥက္ကလာပ မေဓာဝီဆေးရုံကြီးကို ပို့ဆောင်ပေးခဲ့တယ်လို့ သိရပါတယ်။
