ထိုင်းနိုင်ငံမှာ အလုပ်သွားလုပ်ပြီး မဲဆောက်-မြဝတီချစ်ကြည်ရေးတံတားကနေ ပြန်ဝင်လာတဲ့ မြန်မာ‌ရွှေ့ပြောင်းလုပ်သားတွေနဲ့ အကြောင်းအမျိုးမျိုးကြောင့် ထိုင်းမှာပြစ်ဒဏ်ခံရပြီး ပြန် လွှတ်လာတဲ့သူတွေထဲမှာ တချို့ ကိုဗစ်-၁၉ ရောဂါပိုးကူးစက်ခံရထားရတာ စစ်ဆေးတွေ့ရှိပါတယ်။ 

ဧပြီ ၂၆ ရက်က ပြန်ဝင်လာသူတွေထဲမှာ ကိုဗစ်-၁၉ ကူးစက်ခံထားရသူ ၁၀ ဦးတွေ့ရှိကြောင်း၊ ဧပြီ ၂၇ နဲ့ ၂၈ ရက်တွေမှာလည်း ပိုးကူးစက်ခံရသူတွေ ထပ်တွေ့တယ်လို့ နေရပ်ပြန်တွေကို ကူညီစောင့်ရှောက်ပေးနေတဲ့ မြဝတီ အခြေစိုက် အလင်းသစ်ပရဟိတအသင်း ဥက္ကဋ္ဌ ဦးအောင်ဇော်ဦးက ဒီဗွီဘီကို ပြောပါတယ်။ 

“တဖက်နိုင်ငံကနေပြန်ဝင်လာရင် ဒီဘက်မှာ ကိုဗစ်-၁၉ ပိုးရှိမရှိပြန်စစ်တယ်။ စစ်ဆေးလို့ ကူးစက်တာတွေ့ရင် ကျနော်တို့ပရဟိတအဖွဲ့က သွားကြိုပြီး ကွာရန်တင်းစင်တာတွေဆီ ပို့ပေးရပါတယ်ခင်ဗျ။ ပေါ့စ်တစ်ဖြစ်တဲ့လူက နေ့တိုင်းလိုတွေ့တယ်။ ၂၆ ရက်နေ့က ၁၀ ယောက် အမျိုးသား ၇ ယောက်၊ အမျိုးသမီး ၃ ယောက်၊ မနေ့က ၉ ယောက် အမျိုးသား ၅ ယောက်၊ အမျိုးသမီး ၄ ယောက်၊ သူတို့နဲ့ပါလာတဲ့ကလေး  ၂ ယောက်လည်း ထိစပ်သူအဖြစ်နဲ့ ကွာရန်တင်းဝင်ရတယ်။ ဒီကနေ့မနက်လည်း ပေါ့စ်တစ် ၉ ယောက်ထပ်တွေ့တယ်။ အဝင်ဂိတ်က ညနေမှပိတ်တာဆိုတော့ ဒီနေ့ စာရင်းအတိ အကျမရသေးဘူး။ နောက်ထပ်တွေ့မလား မပြောတတ်ဘူးခင်ဗျ။”

ကိုဗစ်-၁၉ ပိုးတွေ့သူနဲ့ ဆက်စပ်သူတွေကို မြဝတီအမှတ် ၄ ရပ်ကွက်ရှိ ရွှေမြဝတီ ကိုဗစ်စင်တာမှာထားရှိပြီး လောလောဆယ် စင်တာမှာ လူ ၁၃၂ ဦး ရှိတယ်လို့ ဆိုပါတယ်။

ပိုးကူးစက်ခံရသူတွေမှာ ရောဂါလက္ခဏာဆိုးရွားတဲ့သူတွေမရှိကြောင်း ၊ အများအား ဖြင့်သာမန်လူလိုပဲဖြစ်နေပြီး စစ်ဆေးကြည့်မှသိရကြောင်း၊ အဆိုပါစင်တာက လူနာနဲ့ ကွာရန်တင်းဝင်နေသူတွေအတွက် ဆေးကုသရေးနဲ့ စားရေးသောက်ရေးကို  နိုင်ငံတော်စရိတ်နဲ့ ထောက်ပံ့ပေးနေတယ်လို့ ဆိုပါတယ်။

ထိုင်းတောင်ပိုင်း ရနောင်းဘက်ကနေ မြန်မာပြည် ကော့သောင်းဘက်ကို ပြန်သွားတဲ့ သူတွေထဲမှာလည်း ကိုဗစ်-၁၉ ပိုးကူးစက်ခံရသူတွေ ရှိနေပါတယ်။ 

ထိုင်းမှာ အကြောင်းအမျိုးမျိုးကြောင့် ပြစ်ဒဏ်ကျပြီး လွှတ်ရက်စေ့လို့ ပြီးခဲ့တဲ့ ဧပြီ ၂၄ ရက်က ပြန်ရောက်လာကြသူတွေထဲမှာ ကိုဗစ်-၁၉ ပိုးကူးစက်ခံရသူ ၁၂ ဦးတွေ့ရှိတယ်လို့ ကော့သောင်းအခြေစိုက် ရွှေ့ပြောင်းလုပ်သားပညာရေး နဲ့ဖွံ့ဖြိုးရေး စင်တာ FED / MEC တာဝန်ခံ ဦးမိုးဝေက ပြောပါတယ်။

သာမန်ပြန်ဝင်လာသူတွေထဲမှာတော့ ကိုဗစ်-၁၉ ကူးစက်ခံရသူမတွေ့သေးကြောင်းနဲ့ နေ့ချင်းပြန်ဆိုရင်တော့ ကိုဗစ်-၁၉ စစ်ဆေးမှုမရှိဘူးလို့ သိရပါတယ်။