ဧရာ၀တီတိုင်း၊ အင်္ဂပူမြို့ သင်္ကြန်မဏ္ဍပ်မှာ ဧပြီ ၁၅ ရက်နေ့ (သင်္ကြန်အကြပ်နေ့) မနက်အစောပိုင်းက ဗုံးပေါက်ကွဲခဲ့တာကြောင့် စစ်ကောင်စီ တပ်သား ၃ ဦးဒဏ်ရာရရှိခဲ့တယ်လို့ ဒေသခံတွေက ပြောပါတယ်။
စစ်ကောင်စီတပ်က ပြုလုပ်ထားတဲ့ ပညာရေးမှူးရုံးရှေ့ သင်္ကြန်မဏ္ဍပ်မှာ မနက်အစောပိုင်း ဗုံးတွေရှိတာကြောင့် တောင်းနဲ့အုပ်ထားပြီး သတင်းပို့နေချိန်မှာ ဗုံးကွဲခဲ့တာလို့ ဆိုပါတယ်။
“မနက်အစောကြီးထပေါက်တာ၊ ဘယ်သူမှာမရှိသေးဘူး။ သူတို့တွေပဲရှိတဲ့ အချိန်ပေါက်တာ၊ စစ်သား ၁ ဦးနဲ့ ရဲ ၂ ဦးတော့ အစတွေမှန်သွားတယ်” လို့ ဒေသခံတဦးက ပြောပါတယ်။
ဗုံးပေါက်ကွဲပြီးနောက်ပိုင်း စစ်ကောင်စီတပ်သားတွေ ရောက်လာပြီး ဒဏ်ရာရရှိတဲ့သူတွေကို ဆေးရုံတင်ကားနဲ့ သယ်ဆောင်သွားသလို မဏ္ဍပ်တဝိုက်ကိုလည်း စစ်ဆေးခဲ့တယ်လို့ ဆိုပါတယ်။
ဗုံးပေါက်ကွဲခဲ့တဲ့ မဏ္ဍပ်မှာ မနက်ပိုင်း ဆက်ဖွင့်ပေးပေမယ့် လာရောက်ရေကစားတဲ့သူ အနည်းငယ်သာ ရှိတော့တယ်လို့ ဒေသခံတွေက ပြောပါတယ်။
စစ်ကောင်စီကပြုလုပ်တဲ့ သင်္ကြန်မဏ္ဍပ်ဗုံးခွဲမှုကို ရဲနဲ့ စစ်သားတွေရှိနေချိန်မှာ ဖောက်ခွဲခဲ့တာလို့ အင်္ဂပူမြို့နယ်ပြည့်သူကာကွယ်ရေးတပ်ဖွဲ့ (ပကဖ) က သတင်းထုတ်ပြန်ထားပါတယ်။
