မန္တလေးတိုင်း၊ အမရပူရမြို့နယ်၊ မြစ်ငယ်မြို့၊ ဆောက်တောဝမြောက်ရွာရှိ နေအိမ်တအိမ်မှာ မတ်လ ၁၂ ရက် နေ့လယ် ၁၂ နာရီလောက်က ကျပ်သိန်း ၆၈၀ ကျော်ဖိုး ရွှေထည်ပစ္စည်းတွေ ဓားပြတိုက်ခံခဲ့ရပြီး ဓားပြ ၃ ဦးကို မတ်လ ၁၅ ရက်မှာ ဖမ်းဆီးရမိခဲ့တယ်လို့ မြို့ခံတွေဆီက သိရပါတယ်။
အဲဒီနေ့က ဆောက်တောဝမြောက်ရွာက နေအိမ်မှာ အသက် ၆၉ နှစ်အရွယ် အိမ်ရှင် အမျိုးသမီး တဦးတည်းရှိနေချိန်မှာ ကျား ၂ ဦး၊ မ ၂ ဦးပါ ဓားပြအဖွဲ့က အိမ်နောက်ဖေးက ဝင်လာပြီး အိမ်ရှင်အမျိုးသမီးကို မျက်လုံး၊ ပါးစပ်ပိတ် ဓားနဲ့ထောက် လုယက်ခဲ့တာပါ။
လုယက်မှုကြောင့် နေအိမ်အိပ်ခန်းအတွင်း သိမ်းဆည်းထားတဲ့ ရွှေကွပ်စိန်ဆွဲကြိုး ၅ ကုံး၊ ပီခြူးလက်ကောက် ၁၄ ကွင်း၊ တကျပ်သားလက်စွပ် ၄ ကွင်းနဲ့ တခြားရွှေထည်တွေ ခန့်မှန်းတန်ဖိုး သိန်း ၆၈၀ ကျော်ကို ဓားပြတွေ ယူဆောင်သွားတယ်လို့ သိရပါတယ်။
အမရပူရမြို့နယ်ရဲစခန်းနဲ့ နီးစပ်သူတဦးက “၁၂ ရက်နေ့ နေ့ခင်းက ဖြစ်သွားတဲ့ ဓားပြမှုက လူတွေ ဖမ်းမိပါပြီ။ လောလောဆယ် ၃ ယောက် မိထားတယ်။ အသက် ၃၀ ကျော်က ကျား ၁ ဦး၊ မ ၁ ဦး၊ ကျန်အမျိုးသမီးက ၂၀ ကျော်ပဲ ရှိသေးတယ်။ ဖမ်းမိတာ ၁၅ ရက် မနက်ပိုင်းက သံသယရှိ ဆိုင်ကယ် ၂ စီးကို တားရင်း မိတာ။ အတိုက်ခံရတဲ့ အိမ်နဲ့က ဒီအဖွဲ့က အမျိုးသမီးတယောက်က အသိတွေလို့ ပြောတယ်။ ဆွဲကြိုး ၂ ကုံးနဲ့ လက်ကောက် ၇ ကွင်းပဲ ပြန်ရသေးတယ်။ ဆိုင်ကယ်တစီးကလည်း ဆွဲကြိုးရောင်းရငွေနဲ့ ဝယ်ထားတာလို့ စစ်ချက်ထွက်ထားတယ်” လို့ ပြောပါတယ်။
အဆိုပါ ဓားပြတိုက်လုယက်မှု ကျူးလွန်သူ ၄ ဦးအနက် ကျား ၁၊ မ ၂ ဦးပါ ပေါင်း ၃ ဦးကို ပီခြူးလက်ကောက် ၇ ကွင်း၊ ရွှေကွပ်စိန်ဆွဲကြိုး ၂ ကုံး၊ ရွှေဆွဲသီး ၁ ခု၊ ရွှေပန်းပွင့် ၁ ခုတို့နဲ့ အမရပူရမြို့နယ်ရဲတပ်ဖွဲ့က မတ်လ ၁၅ ရက်မှာ ဖမ်းမိခဲ့ပြီး ဓားပြအဖွဲ့ဝင် အမျိုးသား ၁ ဦး လွတ်မြောက်နေသေးတယ်လို့ သိရပါတယ်။
