တနင်္သာရီတိုင်း၊ တနင်္သာရီမြို့နယ်၊ ညောင်ပင်ကွင်းနဲ့ ကျွဲထိန်းကုန်းရွာနားက စစ်တပ်ပိုင် ရာဘာခြံထဲက ရာဘာစေးပြားတွေကို မတ် ၅ ရက်မနက်ပိုင်းက သွားရောက် မီးရှို့ခဲ့တယ်လို့ ဒေသတွင်းပြည်သူ့ကာကွယ်ရေးတပ်ဖွဲ့က သိရပါတယ်။
မနက် ၅ နာရီလောက်မှာ ခလရ ၅၆၁ တပ်ရင်းပိုင် ရာဘာခြံက ရာဘာစေးပြားတွေကို တနင်္သာရီပြည်သူ့ကာကွယ်ရေးတပ်ဖွဲ့နဲ့ မြိတ်ခရိုင်တပ်ရင်း ၂ တို့ ပူးပေါင်း မီးရှို့ခဲ့တာဖြစ်ပြီး ခြံအလုပ်သမားတွေကိုလည်း အလုပ်ကနေ အပြီးထွက်သွားဖို့တိုက်တွန်းခဲ့တယ်လို့ ပြည်သူ့ ကာကွယ်ရေးတပ်ဖွဲ့ဝင် တဦးက ပြောပါတယ်။
"ဒီရာဘာခြံကရတဲ့အကျိုးအမြတ်တွေက စစ်တပ်ဆီကို စီးဆင်းနေတာပါ။ ဒီတော့ စစ်တပ်ကို ထောက်ပံ့မှုပေးနေတာလို့ပြောလို့ရတယ်။ မရှိလို့ လုပ်စားတာလို့ပဲ ပြောပြော စစ်တပ် ဒေါက်တိုင်အဖြစ် အလုပ်လုပ်ပေးနေတာကြောင့် အလုပ်သမားတွေကို မောင်းထုတ်လိုက်တယ်”
အဲဒီခြံကရတဲ့အကျိုးအမြတ်ကို ခလရ ၅၆၁ နဲ့ ခြံအလုပ်သမားတွေ တဝက်စီခွဲယူကြတယ်လို့ သိရပါတယ်။
အရင်ကလည်း တနင်္သာရီမြို့နယ်မှာ စစ်တပ်နဲ့ ပတ်သက်တဲ့ ထုတ်ကုန်တွေ ဝယ်ယူ မသုံးစွဲဖို့ ဒေသကာကွယ်ရေးတပ်တွေက အမိန့်ထုတ်တားမြစ်ထားပါတယ်။
