တနင်္သာရီတိုင်း၊ ရေဖြူမြို့နယ်၊ ကံပေါက်ဒေသမှာ စစ်ကောင်စီက ဒေသခံအမျိုးသမီး ၅ ယောက်ကို ဖမ်းဆီးသွားပြီး ကံပေါက်ရဲစခန်းကတဆင့် မောရဝတီရေတပ်ကို ခေါ်ဆောင်စစ်ဆေးနေတယ်လို့ ဖမ်းဆီးခံရသူတွေနဲ့ နီးစပ်တဲ့ဒေသခံတွေက ပြောပါတယ်။
ကံပေါက် လှည်းကုန်း ၁ ရပ်ကွက်မှာနေထိုင်တဲ့ မမာမာဝေ၊ မသန်းသန်းစိုး၊ မချိုချိုအောင်၊ မမိသန်းကြွယ်နဲ့ မရွက်နုဝေ တို့ဟာ ဆန္ဒပြရာမှာပါဝင်တယ်ဆိုပြီး ဖေဖော်ဝါရီ ၁၀ ရက်နေ့မှာ အဖမ်းခံခဲ့ရတာဖြစ်ပါတယ်။
အဖမ်းခံရသူတဦးရဲ့ မိသားစုနဲ့နီးစပ်သူက "ဆန္ဒပြတုန်းက မှတ်တမ်းဓာတ်ပုံတခုမှာ အခုအဖမ်းခံရတဲ့ အမျိုးသမီး ၅ ယောက်ပုံပါနေတယ်လို့ အကြောင်းပြပြီး စစ်ဆေးဖို့ ခေါ်သွားတာ အခု ၂ ရက်ရှိနေပြီ" လို့ ပြောပါတယ်။
ဖေဖော်ဝါရီ ၉ ရက်နေ့ညမှာလည်း ကံပေါက်ကျေးရွာ ခိုင်သဇင်ရပ်ကွက်နေအိမ်တလုံးမှာ စစ်ကောင်စီက ဝင်ရောက်ရှာဖွေခဲ့ပေမဲ့ ဖမ်းဆီးခံရတာတော့မရှိဘူးလို့ သိရပါတယ်။
ကံပေါက်ဒေသက စစ်ကောင်စီခန့်အုပ်ချုပ်ရေးမှူး ဦးခင်စိုးနဲ့ တပည့်ဦးလှဌေးတို့ ပစ်ခတ်ခံရတဲ့ ဇန်နဝါရီ နောက်ဆုံးအပတ်မှာ ဒေသခံ ၁၅ ဦး အဖမ်းခံရပြီး ၁၂ ဦး ပြန်လွတ်လာခဲ့ပါတယ်။
ဖေဖော်ဝါရီလဆန်းမှာ နောက်ထပ်ဒေသခံ ၄ ဦး ပြန်အဖမ်းခံရပြီးနောက် ၃ ဦး ပြန်လွတ်လာခဲ့ပါတယ်။ အခု အမျိုးသမီး ၅ ဦးအပါအဝင် ဖမ်းဆီးထိန်းသိမ်းခံထားရဆဲ ဒေသခံ ၈ ဦးရှိနေပြီလို့ သိရပါတယ်။
