ထိုင်း-မြန်မာနယ်စပ်၊ ချင်းမိုင်ခရိုင်၊ ဖှန်မြို့နယ်၊ မွမ့်ပင်အုပ်စုမှာ ဇန်နဝါရီ ၉ ရက် မနက်စောစောက မူးယစ်ဆေးသယ်ဆောင်တဲ့အဖွဲ့နဲ့ ထိုင်းစစ်တပ်တို့ ပစ်ခတ်မှုဖြစ်ပြီး မူးယစ်မှောင်ခိုအဖွဲ့ဝင် အလောင်း ၆ လောင်းနဲ့ ခေတာမင်းမူးယစ်ဆေး ကီလို ၃၀၀ ကျော် ဖမ်းဆီးရမိတယ်လို့ ထိုင်းသတင်းတွေမှာ ဖော်ပြပါတယ်။ 

မနေ့မနက် ၃ နာရီခွဲလောက်က ထိုင်း အမှတ် ၃ ကွန်မန်ဒိုတပ်ဖွဲ့နဲ့ အမှတ် ၄ နယ်ခြားစောင့် တပ်တွေပူးပေါင်းပြီး နယ်မြေလုံခြုံရေးနဲ့တရားဥပဒေစိုးမိုးရေးဆောင်ရွက်နေစဉ် မွမ့်ပင်ကျေးရွာ အုပ်စုဘန့်ပါကွေ့ကျေးရွာအနီး တောထဲကနေ ကျောပိုးအိတ်တွေနဲ့ ဝင်ရောက်လာတဲ့ လူ ၂၀ ကျော် တွေ့ရှိကြောင်း ၊ တာဝန်ရှိသူတွေက စစ်ဆေးဖို့ရပ်တံ့ဖို့ အမိန့်ပေးစဉ် တဘက်က သေနတ်နဲ့ စတင် ပစ်ခတ်တဲ့အတွက် နှစ်ဘက် ၅ မိနစ်ကျော် အပြန်အလှန်ပစ်ခတ်ခဲ့တယ်လို့ ဆိုပါတယ်။

သေနတ်သံတွေငြိမ်သက်သွားပေမယ့် အချိန်ကမှောင်နေဆဲမို့ ချက်ချင်းနယ်မြေရှင်းလင်းရေး မ လုပ်နိုင်ကြောင်း ၊ ဒါပေမဲ့ အဆိုပါနေရာတဝိုက်ကို ထိုင်းစစ်တပ်က ဝိုင်းထားပြီး မနက် ၅ နာရီ လောက်မှာ သွားရောက်စစ်ဆေးရာမှာ မူးယစ်ဆေးသယ်ဆောင်သူဘက်က အလောင်း ၆ လောင်း၊ လက်ဖက်ခြောက်ထုတ်ဘမ်းပြ ခေတာမင်းမူးယစ်ဆေးတွေထည့်ထားတဲ့ ကျောပိုးအိတ် ၁၉ လုံး၊ ပြောင်းရှည်သေနတ် ၃ လက်နဲ့ တယ်လီဖုံး ၄ လုံးကို သိမ်းဆည်းရမိတယ်လို့ ဆိုပါတယ်။ ခေတာမင်းမူးယစ်ဆေး စုစုပေါင်းအလေးချိန် ၃၀၀ ကီလိုဂရမ်ကျော်မယ်လို့ တာဝန်ရှိသူတွေက ခန့်မှန်းပါတယ်။ 

တာဝန်ရှိသူတွေက နယ်မြေဝင်ရောက်ရှင်းလင်းစဉ် မူးယစ်သယ်ဆောင်တဲ့အဖွဲ့က သူတို့ပစ္စည်းတွေ ပြန်ယူဖို့ကြိုးစားတဲ့အနေနဲ့ ဒုတိယအကြိမ်ထပ်မံပစ်ခတ်ခဲ့ကြောင်း၊ ထိုင်းစစ်တပ်ဘက်က ပြန် ပစ်တာကြောင့် နယ်စပ်တောထဲကို ပြန်ဝင်ပြေးသွားကြတယ်လို့ ဆိုပါတယ်။ 

အခင်းဖြစ်ပွါးတဲ့နေရာဟာ မြန်မာဘက်ခြမ်း မိုင်းဆတ်ခရိုင်နဲ့ မျက်နှာချင်းဆိုင် နယ်စပ်နဲ့ ၂ ကီလိုမီတာသာ ကွာဝေးတယ်လို့ ဆိုပါတယ်။

Ref-SiamRath