ဇန်နဝါရီ ၄ ရက်နေ့ လွတ်လပ်ရေးနေ့မှာ ဧရာဝတီတိုင်း၊ ပုသိမ်အကျဥ်းထောင်ကနေ သတင်းထောက် ကိုမျိုးမင်းထွန်းအပါအဝင် နိုင်ငံရေးအကျဥ်းသား ၃၈ ဦး ပြန်လွတ်လာတယ်လို့ အကျဥ်းထောင်အသိုက်အဝန်းက သိရပါတယ်။
ဧရာဝတီတိုင်းမ်သတင်းဌာနရဲ့ အယ်ဒီတာဟောင်း ဖြစ်သူ ကိုမျိုးမင်းထွန်းအပါအဝင် နိုင်ငံရေးအကျဥ်းသား ၃၈ ဦးကို ညနေ ၅ နာရီကျော်လောက်မှာ ပြန်လွှတ်ပေးခဲ့တာလို့ ဒေသခံတွေက ပြောပါတယ်။
''ကိုမျိုးထွန်းကတော့ အိမ်ပြန်ရောက်ပါပြီ၊ နေကောင်း ကျန်းမာပါတယ်။ ကျန်တဲ့သူတွေလည်း အိမ်ပြန်ရောက်လောက်ပါပြီ၊ လွတ်ရက်နီးတဲ့သူတွေ ပြန်လွှတ်ပေးတဲ့ပုံစံပါ'' လို့ ကိုမျိုးမင်းထွန်းနဲ့ နီးစပ်သူတဦးက ပြောပါတယ်။
လွတ်လပ်ရေးနေ့မှာ ပြန်လွှတ်ပေးတဲ့ ပုသိမ်အကျဥ်းထောင်က နိုင်ငံရေးအကျဥ်းသား ၃၈ ဦးဟာ ပြစ်ဒဏ်ချမှတ်ခံရပြီး လွတ်မြောက်ဖို့အတွက် ၁ နှစ်အောက် ကျန်တဲ့သူတွေဖြစ်တယ်လို့ ဆိုပါတယ်။
ပုသိမ်အကျဥ်းထောင်ကနေ ဇန်နဝါရီ ၄ ရက်နေ့ ပြန်လွှတ်ပေးတဲ့အထဲမှာ နိုင်ငံရေးအကျဥ်းသား ၃၈ ဦးအပြင် ခိုးဆိုလုနိုက်တဲ့ အမှုတွေနဲ့ ထောင်ပြစ်ဒဏ်ချမှတ်ခံရသူတွေလည်း ပါဝင်ပြီး အရေအတွက် အတိအကျကိုတော့ မသိရသေးဘူးလို့ ထောင်ဝသွားကြိုခဲ့တဲ့ မိသားစုဝင်တွေက ပြောပါတယ်။
