ကရင်နီ (ကယား) ပြည်နယ်၊ ဒီးမော့ဆိုမြို့နယ်၊ ပူဖားကျေးရွာမှာ ဒီဇင်ဘာ ၇ ရက်က ဖြစ်ပွားခဲ့တဲ့ တိုက်ပွဲအတွင်း ကရင်နီအမျိုးသားများကာကွယ်ရေးတပ် တပ်ရင်း-၆ မှ ရဲဘော် ၃ ဦး ကျဆုံးသွားခဲ့ကြောင်း အဖွဲ့က ထုတ်ပြန်ပါတယ်။

စစ်ကြောင်းပြန်ထိုးလာတဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ်တို့အကြား ဒီဇင်ဘာ ၇ ရက်က တိုက်ပွဲဖြစ်ပွားခဲ့ပြီး KNDF တပ်ရင်း-၆ မှ ရဲဘော်စတီးဖင်း၊ ရဲဘော်ဒါးဝီမောင်ငယ်နဲ့ ရဲဘော်ဂျေနေဦး တို့ဟာ တိုက်ပွဲတွင်း ပိတ်မိပြီး ကျဆုံးသွားခဲ့တာပါ။

အလားတူ အဆိုပါတိုက်ပွဲအတွင်းမှာဘဲ ဒီးမော့ဆိုမြို့နယ် ပြည်သူ့ကာကွယ်ရေးတပ် (DMO_PDF) တပ်ရင်း D မှ တပ်စုမှူး ရဲဘော်တွတ်ကီလည်း ကျဆုံသွားခဲ့ရကြောင်း အဖွဲ့ရဲ့ လူမှုကွန်ရက်မှာ ဖော်ပြပါတယ်။

ပြီးခဲ့တဲ့ နိုဝင်ဘာ ၂၉ ရက်က စစ်ကောင်စီတပ်ဟာ ကုန်းသာကျေးရွာမှာ တပ်စွဲထားတဲ့ နေရာကို စွန့်ခွာသွားခဲ့ပြီး ဒီဇင်ဘာ ၃ ရက်မှာ အင်အား ၁၀၀ ကျော်ရှိတဲ့ စစ်ကြောင်းသုံးကြောင်းနဲ့ ပြန်လည် ထိုးစစ်ဆင်လာခဲ့ပါတယ်။

ဒီလို ထိုးစစ်ဆင်လာတဲ့အတွက် ပြည်သူ့ကာကွယ်ရေးတပ်တွေနဲ့ တိုက်ပွဲဖြစ်ပွားခဲ့ပြီး တိုက်ပွဲဖြစ်ပွားတဲ့ အတောအတွင်း စစ်ကောင်စီဘက်က တိုက်လေယာဉ်နှစ်စီးအပြင် လက်နက်ကြီးတွေနဲ့လည်း ပစ်ခတ်ခဲ့ပါတယ်။

သေးဆူလဲ-နန်းမယ်ခုံကျေးရွာ တကြောမှာ ပြီးခဲ့တဲ့ရက်ပိုင်းအတွင်း ဖြစ်ပွားခဲ့တဲ့ တိုက်ပွဲမှာ စစ်ကောင်စီဘက်က သေဆုံးမှုတွေလည်း ရှိသလို ကရင်နီဒေသခံကာကွယ်ရေး ပူးပေါင်းတပ်ဖွဲ့ဘက်က ကျဆုံးမှုတွေလည်း ရှိနေတာဖြစ်ပါတယ်။