ဧရာဝတီတိုင်း၊ ဘိုကလေးမြို့နယ်မှာ အုပ်စုဖွဲ့ လုယက်မှုများလာတာကြောင့် ပြည်သူတွေ နယ်ဝေခရီးသွားလို့ဖို့ ထိတ်လန့်နေကြတယ်လို့ ဒေသခံတွေက ပြောပါတယ်။
အောက်တိုဘာ ၂ ရက်နေ့ကလည်း အမျိုးသားတဦး ကလေးနှစ်ယောက်နဲ့အတူ ဆိုင်ကယ်နဲ့ ကဒုံကနိ - ဘိုကလေးကားလမ်းအတိုင်း လာချိန်မှာ မီးသွေးချောင်းတံတားအနား အမျိုးသား ၅ ဦးရဲ့ ရိုက်လုတာ ခံခဲ့ရပြီး ဆိုင်ကယ်နဲ့ ငွေသား ၃ သိန်း ပါသွားတယ်လို့ ဘိုကလေးမြို့ခံတဦးက ပြောပါတယ်။
“စက်တင်ဘာလထဲမှာဆိုလည်း ဖုန်းလုခံရတာတွေ၊ ဆိုင်ကယ်အလုခံရတာတွေ အနည်းဆုံး ၃ မှုလောက် ရှိမယ်၊ ဒါတောင် ရဲစခန်းတိုင်လို့ သိရတဲ့ဟာ။ မသိရတဲ့ဟာတွေလည်း အများကြီးရှိနိုင်သေးတယ်၊ အဓိကတော့ လုံခြုံမှုမရှိတော့တာပေါ့။”
အောက်တိုဘာ ၂ ရက်နေ့က အမည်မသိအမျိုးသား ၅ ဦးရဲ့ လုယက်ခံခဲ့ရတဲ့ အသက် ၄၈ နှစ်အရွယ် အမျိုးသားဟာ ဓားနဲ့ရော တုတ်နဲ့ပါ ထိုးခုတ်ခံခဲ့ရတာကြောင့် ဆေးရုံတက်ရောက်ကုသနေရတယ်လို့ ဆိုပါတယ်။
စစ်အာဏာသိမ်းပြီးနောက်ပိုင်းမှာ နယ်ဝေခရီးသွားလာတဲ့အခါ လုယက်ခံရမှုတွေ များလာတာကြောင့် ဒေသခံတွေ ဆိုင်ကယ်နဲ့ တရွာနဲ့တရွာ ခရီးသွားလာဖို့ ထိတ်လန့်လာရတယ်လို့ ဆိုပါတယ်။
ဆိုင်ကယ်နဲ့ ငွေ ၃ သိန်းရိုက်လုခံရတာနဲ့ ပတ်သက်ပြီး ကြိမ်ချောင်းကြီးနယ်မြေရဲစခန်းမှာ ရာဇသတ်ကြီးပုဒ်မ ၃၉၇ နဲ့ အမှုဖွင့်ထားပြီး တရားခံဖမ်းမိတာမျိုးတော့ မရှိသေးဘူးလို့ ရဲတပ်ဖွဲ့အသိုက်အဝန်းက သိရပါတယ်။
