မွန်ပြည်နယ်၊ ရေးမြို့နယ်၊ ခေါဇာမြို့မှာ ဒီကနေ့ အောက်တိုဘာ ၃ ရက်နေ့ ညနေ ၅ နာရီခွဲလောက်က ဖြစ်ပွားခဲ့တဲ့ နှစ်ဖက်တိုက်အတွင်း မျိုးချစ်ရဲဘော် ၂ ဦး ကျဆုံးခဲ့တယ်လို့ မွန်ပြည်ကာကွယ်ရေးတပ်(MSDF –S) တောင်ပိုင်း ပြောခွင့်ရ နိုင်နဂါးက ဒီဗွီဘီကို ပြောပါတယ်။
မွန်ပြည်ကာကွယ်ရေးတပ်က ခေါဇာမြို့မှာ စစ်ကြောင်းလှုပ်ရှားစဉ် စစ်ကောင်စီ ခြေလျင်တပ်ရင်း (ခလရ - ၃၁) နဲ့ ထပ်တိုက်တွေ့ဆုံပြီး နှစ်ဖက်တိုက်ပွဲ ဖြစ်ပွားခဲ့တာပါ။
၂၅ မိနစ်နီးပါးအကြာ နှစ်ဖက်တိုက်ပွဲအတွင်း အာဏာရှင်ဖြုတ်ချရေးအတွက် တိုက်ပွဲဝင်နေတဲ့ မွန်ပြည်ကာကွယ်ရေးတပ်က မျိုးချစ်ရဲဘော် ၂ ဦး အသက်ပေးလှူခဲ့ရတာပါ။
အဲဒီနှစ်ဖက်တိုက်ပွဲအတွင်းမှာ စစ်ကောင်စီဘက်က တပ်ရင်းဗိုလ်ကြီး တဦးနဲ့ တပ်သားတဦး သေဆုံးပြီး နောက်ထပ် တပ်သား တဦး ဒဏ်ရာအပြင်းအထန် ရရှိခဲ့ကြောင်း သတင်းရရှိထားတယ်လို့ မွန်ပြည်ကာကွယ်ရေးတပ်(MSDF –S) တောင်ပိုင်း ပြောခွင့်ရ နိုင်နဂါးက ပြောပါတယ်။
နှစ်ဖက်တိုက်ပွဲအတွင်း အင်အားမမျှပေမယ့် မွန်ပြည်ကာကွယ်ရေးတပ်က လုံခြုံစိတ်ချရာနေရာကို ပြန်လည် ဆုတ်ခွာနိုင်ခဲ့တယ်လို့ ဆိုပါတယ်။
မွန်ပြည်ကာကွယ်ရေးတပ်(တောင်ပိုင်း)ဟာ ပြီးခဲ့တဲ့ စက်တင်ဘာ ၁ ရက်နေ့ကလည်း ခေါဇာနယ်မြေရဲစခန်းကို တပ်တည်ထောင်ပြီးနောက် ပထမဦးဆုံး စစ်ရေးအဖြစ် ဝင်ရောက် တိုက်ခိုက်ခဲ့ထားတာပါ။
မွန်ပြည်ကာကွယ်ရေးတပ်(တောင်ပိုင်း)ဟာ စစ်တပ် အာဏာသိမ်းပြီးနောက် မွန်လူငယ်တွေ အပါအဝင် မွန်ပြည်နယ်အတွင်းရှိ တိုင်းရင်းသားလူငယ်တွေနဲ့ ဖွဲ့စည်းထားတဲ့ တပ်ဖွဲ့ တစ်ခုလည်း ဖြစ်ပါတယ်။
