မွန်ပြည်နယ်၊ မော်လမြိုင်မြို့၊ ရွှေတောင်ရပ်ကွက်မှာ အမှတ်(၅) အထက်တန်းကျောင်း အုတ်တံတိုင်းပြိုကျတာကြောင့် လူ ၅ ဦး သေဆုံးပြီး ၁ ဦး ဒဏ်ရာရရှိခဲ့တယ်လို့ လူမှုကယ်ဆယ်ရေးအဖွဲ့တွေက ဒီဗွီဘီကို ပြောပါတယ်။
အဲဒီကျောင်းအုတ်တံတိုင်းဟာ ဇူလိုင် ၂၂ ရက် မနက် ၉ နာရီလောက်မှာ စာသင်ကျောင်းဘေးက ဈေးဆိုင်တန်းတွေအပေါ် ပြိုကျခဲ့တာ ဖြစ်ပါတယ်။
အုတ်တံတိုင်း ပြိုကျမှုကြောင့် အမျိုးသမီး ၃ ဦးနဲ့ အမျိုးသား ၂ ဦး သေဆုံးခဲ့ပြီး ၁ ဦး ဒဏ်ရာရရှိခဲ့တယ်လို့ လူမှုကယ်ဆယ်ရေးအဖွဲ့ တာဝန်ရှိသူ တစ်ဦးက ပြောပါတယ်။
အုတ်တံတိုင်းပြိုကျမှုကြောင့် သေဆုံးသွားတဲ့သူတွေနဲ့ ဒဏ်ရာရရှိခဲ့တဲ့သူကို မော်လမြိုင်ပြည်သူ့ဆေးရုံသို့ ပို့ဆောင်ထားပြီး လက်ရှိမှာတော့ ကယ်ဆယ်ရေးလုပ်ငန်းတွေ ပြီးစီးသွားပြီးလို့ ဆိုပါတယ်။
အထက(၅) စာသင်ကျောင်း အုတ်တံတိုင်း နှစ်ပေါင်းများစွာ ကြာမြင့်နေပြီး ဖြစ်သလို မော်လမြိုင်မှာ မိုးဆက်တိုက် ရွာသွန်းနေတာကြောင့် မြေနူးပြီး ပြိုကျခဲ့တာ ဖြစ်ပါတယ်။
အုတ်တံတိုင်းပြိုကျခဲ့တဲ့ နေရာကိုတော့ လတ်တလောမှာ အသွားအလာ ကန့်သတ်ထားပြီး ဖြတ်သန်းသွားလာခွင့် ပိတ်ပင်ထားပါတယ်။
