ရခိုင်ပြည်နယ်၊ စစ်တွေမြို့နဲ့ တောင်ကုတ်မြို့နယ်တွေမှာ ဇွန်လနဲ့ ဇူလိုင်လ ဒုတိယပတ်အတွင်း ငွေကျပ်တသောင်းတန် ငွေစက္ကူအတု ၃၆ သိန်းဖိုး ဖမ်းဆီးရမိထားတယ်လို့ ပြည်နယ်ရဲအရာရှိထံက သိရပါတယ်။
ဇူလိုင် ၁၃ ရက်က တောင်ကုတ်မှာ တသောင်းတန်အတု ၃၃ သိန်းကျော်နဲ့ တရားခံ သုံးယောက်ကို ဖမ်းဆီးရမိခဲ့ပြီး ဇွန်လတုန်းကလည်း စစ်တွေမြို့က ဧရာဝတီဘဏ်မှာ ငွေလာလွှဲသူဆီကနေ တသောင်းတန်အတု ကျပ် ၃ သိန်းခွဲဖိုး ဖမ်းဆီးရမိခဲ့ကာ ငွေလာလွှဲသူကိုလည်း ဖမ်းဆီးထားတယ်လို့ ရဲအရာရှိက ပြောပါတယ်။
ဇူလိုင် ၁၂ ရက် မနက်ပိုင်းက တောင်ကုတ်မြို့နယ် မီးချောင်းထိုးကျေးရွာနားမှာ တသောင်းတန်အတုတွေ လဲပေးနေတယ်လို့ သတင်းရတဲ့အတွက် ရဲတပ်ဖွဲ့က သွားရောက်ဖမ်းဆီးခဲ့ရာမှာ အခုလို ဖမ်းဆီးရမိခဲ့တာလည်း ဖြစ်ပါတယ်။
ဖမ်းဆီးခံရသူတွေက တောင်ကုတ်မြို့နယ် လိပ်ကုန်ဘောင်ကျေးရွာက အမျိုးသားတယောက်နဲ့ ပဒါကျေးရွာက အမျိုးသမီးနှစ်ယောက်ဖြစ်တယ်လို့ ဆိုပါတယ်။
၂၀၁၉ ခုနှစ် ဇွန်လ ၈ ရက်ကလည်း မောင်တောမြို့နယ်၊ ကမ္ဘောဇဘဏ်ခွဲမှာ ငွေလာလွှဲသူဆီကနေ တသောင်းတန်အတု ၄၁ သိန်းဖိုး ဖမ်းဆီးရမိခဲ့ပါသေးတယ်။
လက်ရှိမှာတော့ ငွေစက္ကူအတုတွေနဲ့ ဖမ်းဆီးရမိသူတွေကို မြန်မာနိုင်ငံတော်ဗဟိုဘဏ်ဥပဒေ ပုဒ်မ ၁၀၅/၁၀၆ နဲ့ အမှုဖွင့် ဆောင်ရွက်ထားတယ်လို့ သိရပါတယ်။
