ရွှေဘိုမြို့မရဲစခန်း ဗုံးပစ်လောင်ချာဖြင့် တိုက်ခိုက်ခံရ
DVB
·
June 7, 2022
စစ်ကိုင်းတိုင်း၊ ရွှေဘိုမြို့မရဲစခန်းကို ဇွန်လ ၇ ရက် မနက် ၄ နာရီက ဒေသခံကာကွယ်ရေးတပ်ဖွဲ့က ၄၀ မမ ဗုံးပစ်လောင်ချာနဲ့ ပစ်ခတ်တိုက်ခိုက်ခဲ့တယ်လို့ Black Wolf PDF က ထုတ်ပြန်ပါတယ်။
ရွှေဘိုမြို့မရဲစခန်းအတွင်းမှာ စစ်ကောင်စီတပ်ဖွဲ့ဝင် ရဲနဲ့ စစ်သားတွေရှိနေချိန် ဒေသခံကာကွယ်ရေးတပ်ဖွဲ့တွေက ၄၀ မမ ဗုံးသီး ၅ လုံးနဲ့ ပစ်ခတ်ခဲ့တာလည်း ဖြစ်ပါတယ်။
“ဒီမနက်ခင်းမှာ ပစ်ခတ်တိုက်ခိုက်ခဲ့တာပါ။ လတ်တလော ရန်သူဘက်က အသေပျောက်ကိုတော့ စုံစမ်းနေဆဲ ဖြစ်ပါတယ် " လို့ Black Wolf PDF အဖွဲ့ တာဝန်ရှိသူက ပြောပါတယ်။
အဲ့ဒီတိုက်ခိုက်မှုကို Black Wolf PDF အထူးတပ်သားတွေနဲ့ ရွှေဘိုခရိုင်တပ်ရင်း (၅) တပ်ခွဲ ၁ တို့မှ ပူးပေါင်းတိုက်ခိုက်ခဲ့တာလို့ ထုတ်ပြန်ချက်မှာပါရှိ ပါတယ်။
၂၀၂၁ အောက်တိုဘာ ၁၀ ရက်ကလည်း ရွှေဘိုမြို့မရဲစခန်းကို ဒေသခံကာကွယ်ရေးတပ်ဖွဲ့က လက်ပစ်ဗုံး ၁၀ လုံးနဲ့ ပစ်ခတ်တိုက်ခိုက်ခဲ့ပါတယ်။
