ကွယ်လွန်သွားပြီဖြစ်တဲ့ ဝါရင့်နိုင်ငံရေးသမားကြီး ရှမ်းတိုင်းရင်းသားခေါင်းဆောင် ဦးခွန်ထွန်းဦးအား ဂုဏ်ပြုပွဲအခမ်းနားကို ထိုင်းနိုင်ငံ ချင်းမိုင်မြို့က ဝပ်ကူတောက်ကျောင်းတိုက်မှာ ဒီနေ့ ကျင်းပနေပါတယ်။
ဂုဏ်ပြုပွဲကို ထိုင်းနိုင်ငံရောက် ရှမ်းတိုင်းရင်းသား အသိုက်အဝန်းက ဦးဆောင်ကျင်းပတာဖြစ်ပြီး ချင်းမိုင်တက္ကသိုလ်က ကျောင်းသားကျောင်းသူတွေ၊ ရှမ်းအမျိုးသမီးရေးရာအဖွဲ့၊ ကေအန်ယူ ဥက္ကဋ္ဌ ဗိုလ်ချုပ်ကြီး မူတူးစေးဖိုး၊ ဒုဥက္ကဋ္ဌဟောင်း နော်စီဖိုးရာစိန်၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး၊ အမျိုးသမီးများအဖွဲ့ချုပ် (WLB) စတဲ့ အဖွဲ့အစည်းတွေအပါအဝင် လူ ၂၀၀ ကျော် တက်ရောက်ခဲ့ကြပါတယ်။
ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီကို စတင်ထူထောင်ရာမှာ ပါဝင်ခဲ့သူလည်းဖြစ်တဲ့ ပါတီဥက္ကဋ္ဌအဖြစ် နှစ်ပေါင်း ၃၀ ကျော်တာဝန်ယူခဲ့တဲ့ ဦးခွန်ထွန်းဦး ၇၉ နှစ်ဟာ ဧပြီ ၃၀ ရက်က ရန်ကုန်မြို့ရှိ သူ့ရဲ့နေအိမ်မှာ ကွယ်လွန်သွားတာဖြစ်ပြီး သူ့ရဲ့ ဈာပနကို ရန်ကုန်မြို့ ရေဝေးသုသာန်မှာ မေလ ၂ ရက်က မီးသင်္ဂြိုဟ်ခဲ့ပါတယ်။
