စစ်ကောင်စီရဲ့ ပစ်ခတ်မှုကြောင့် ဦးခေါင်းကျည်ထိမှန်သေဆုံးခဲ့တဲ့ မန္တလေး ဆေးတက္ကသိုလ် တတိယနှစ်ကျောင်းသား ကိုကျော်ညီဇင်ရဲ့ ရုပ်အလောင်းကို  မေ ၂၁ ရက် ညနေ ၃ နာရီက မန္တလေး အေးရိပ်ငြိမ် သုသာန်မှာ သင်္ဂြိုလ်ခဲ့ပါတယ်။

မေလ ၂၀ ရက်နေ့က မန္တလေး- မုံရွာကားလမ်းမပေါ် မြင်းမူအကျော်နေရာမှာ   စစ်ကောင်စီတပ်ရဲ့ ပစ်ခတ်မှုကြောင့် မန္တလေး ဆေးတက္ကသိုလ် တတိယနှစ်ကျောင်းသား ကိုကျော်ညီဇင်ရဲ့ ဦးခေါင်းကို ကျည်ထိမှန်သေဆုံးခဲ့တာဖြစ်ပါတယ်။

ကိုကျော်ညီဇင်ဟာ ဆေးတက္ကသိုလ် - မန္တလေး ၊ တတိယနှစ်သင်တန်း (၁၂/၂၀၁၇) က ကျောင်းသား ဖြစ်ပြီး  မိသားစုဝင်တွေနဲ့အတူ  ခရီးသွားလာနေစဉ် ကျည်ထိမှန်သေဆုံးခဲ့တာလို့ သိရပါတယ်။

ကိုကျော်ညီဇင်ဟာ စစ်ကောင်စီဖွင့်လှစ်နေတဲ့ တတိယနှစ် အမ်ဘီဘီအက်စ် သင်တန်း ( ပုံမှန် ) ကိုလည်း မတက်ရောက်ဘဲ စစ်အာဏာရှင်ကို ဆန့်ကျင်တော်လှန်နေတဲ့ သပိတ်မှောက်ကျောင်းသား  တဦးဖြစ်တယ်လို့ Medical Family Mandalay က ထုတ်ပြန်ထားပါတယ်။