စစ်ကိုင်းတိုင်း၊ ပုလဲမြို့ပေါ်ရှိ မြို့မရဲစခန်းကို ဧပြီ ၂၆ ရက် ညနေ ၄ နာရီလောက်က ပစ်ခတ်တိုက်ခိုက်ခံခဲ့ရတယ်လို့ ဒေသခံတွေက ပြောပါတယ်။
ပုလဲပြည်သူ့ကာကွယ်ရေးအဖွဲ့တဖွဲ့ဖြစ်တဲ့ ကျားသစ်နက်ပြောက်ကျားတပ်ကတော့ အခုလို မြို့မရဲစခန်းကို ပစ်ခတ်ခဲ့တာဟာ သူတို့ရဲ့လက်ချက်ဖြစ်တယ်လို့ ဒီဗွီဘီကို အတည်ပြု ပြောပါတယ်။
ကျားသစ်နက်အဖွဲ့ ခေါင်းဆောင်ဗိုလ်ဥက္ကာက“ကျနော်တို့ ကျားသစ်နက်အဖွဲ့က ပစ်ခတ်ခဲ့တာဗျ။ အဝေးပစ်လက်နတ်နဲ့ပစ်ခတ်ခဲ့တယ်။ ပစ်ခတ်တဲ့ လက်နက်က ၁၂၀ မမ၊ ၈၀ မမ၊ ၆၀ မမ အလုံး ၂၅လုံး နဲ့ပစ်ခတ်ခဲတာဗျ။ အထိခိုက် အကျအဆုံးကတော့ စစ်ကောင်စီဘက်ကတော့မသိဘူး။ ကျနော်တို့ဘက်ကတော့ တူမီးပြောင်းကွဲပြီး ကိုယ်လက်နက်နဲ့ကိုယ် ရဲဘော်တယောက် လက်ထိခဲ့တာတော့ရှိခဲ့တယ်ဗျ။ ကျနော်တို့ အခုလို့ Safe မဖြစ်တဲ့ လက်နက်တွေနဲ့ တိုက်နေရတာဆိုတော့ ထိထိရောက်ရောက်မဖြစ်ဘူး။ ကျနော်တို့ကို တော်လှန်ရေးသမားလေးတွေ မဆုံးရှုံးရအောင် တတ်နိုင်တဲ့ဘက်ကနေ ကူညီပေးကြပါ”လို့ ပြောပါတယ်။
ပုလဲမြို့ပေါ်မှာ ပစ်ခတ်မှုတွေနဲ့ ပတ်သက်ပြီး မြို့ပေါ်နေပြည်သူတစ်ဦးကတော့ “ပစ်ခတ်တာတော့ ဘယ်က အဖွဲ့ပစ်တာတော့မသိဘူးဗျ။ တအုံးအုံး တဒိုင်းဒိုင်းနဲ့ပဲဗျ။ မြို့ထဲကလည်း လူကသိပ်မနေရဲကြတော့ဘူး။ တခြားမြို့တွေ ပြောင်းတဲ့သူကတော့ ပြောင်းနေတာတွေရှိတယ်” လို့ ပြောပါတယ်။
ပုလဲမြို့မရဲစခန်းသာမက ပုလဲထွေအုပ်ရုံးကိုပါ ဒေါင်းနက်အဖွဲ့က ပစ်ခတ် တိုက်ခိုက်တာတွေလည်းရှိခဲ့တယ်လို့လည်း ပုလဲမြို့နယ်ပြည်သူ့ကာကွယ်ရေးတပ်ဖွဲ့ထံက သိရပါတယ်။
