စစ်ကိုင်းတိုင်း ယင်းမာပင်ခရိုင် ယင်းမာပင်မြို့နယ်မှာ ဧပြီ  ၂၁ ရက် နေ့လယ်  ၂ နာရီလောက်က စစ်ကောင်စီတပ်နဲ့ PDF ပူးပေါင်းအဖွဲ့တို့ ထိတွေ့တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

ယင်းမာပင်မြို့နယ် ဆုံရွာကျေးရွာဘက်ကနေ မင်းမကုန်းကျေးရွာဘက်လာတဲ့ အင်အား ၁၀၀ လောက်ရှိ စစ်ကောင်စီတပ်ဖွဲ့ကို မင်းမကုန်းကျေးရွာနဲ့ ကြိုးကြာဝင်းကျေးရွာအကြားမှာ PDF ပူးပေါင်းအဖွဲ့က တိုက်ခိုက်ရာကနေ နှစ်ဖက် အပြန်အလှန် ပစ်ခတ်မှု ဖြစ်ပွားခဲ့တာလို့ ဆိုပါတယ်။

အပြန်အလှန်ပစ်ခတ်မှုဟာ မိနစ် ၂၀ လောက် ကြာမြင့်ခဲ့ပြီး စစ်ကောင်စီဘက်က ထိခိုက်မှုအခြေအနေ မသိရသေးဘဲ PDF ပူးပေါင်းအဖွဲ့ဘက်က ရဲဘော် ၁ ဦး ကျဆုံးခဲ့တယ်လို့ PDF တပ်ဖွဲ့ဝင် ဗိုလ်သူရိန်က ပြောပါတယ်။

Unity Fighter PDF အဖွဲ့မှ အသက် ၃၀ ဝန်းကျင်ရှိ ရဲဘော် စန်းမြင့်ဌေးဟာ လက်မောင်းကို ကျည်ထိမှန်ခဲ့ရာက အချိန်မီ ဆေးကုသမှု မပေးနိုင်တာကြောင့် သွေးထွက်လွန်ပြီး အသက်ဆုံးရှုံးခဲ့ရတာလို့ ဆိုပါတယ်။

အဲဒီရဲဘော်ဟာ ကျေးရွာအတွင်းက ဒေသခံပြည်သူတွေ ထွက်ခွာနိုင်ဖို့ စစ်ကောင်စီတပ်ဖွဲ့ကို ကာကွယ်ပစ်ခတ်ရင်းကနေ စစ်ကောင်စီတပ်ရဲ့ ပစ်ခတ်မှုခံခဲ့ရတာလို့ တိုက်ခိုက်ရေးမှာပါဝင်တဲ့ PDF ရဲဘော်တဦးက ပြောပါတယ်။

လက်ရှိအချိန်မှာ စစ်ကောင်စီတပ်ဖွဲ့တွေဟာ ကြိုးကြာဝန်းကျေးရွာ ဘုန်းကြီးကျောင်းဝင်း အတွင်းမှာ ရှိနေတယ်လို့ သိရပါတယ်။