ကရင်နီပြည်နယ် (ကယား)၊ ကရင်နီအမျိုးသားကာကွယ်ရေးတပ် KNDF-B 10 မှ ရဲဘော်တဦး ရှေ့တန်းတနေရာမှာ တာဝန်ထမ်းဆောင်ရင်း လက်နက်ကြီးထိမှန် ကျဆုံးသွားတယ်လို့ KNDF B-10 က ထုတ်ပြန်ထားပါတယ်။
KNDF B-10 က ခွဲ ၁၊ စု ၃၊ စုမှူးအဖြစ် တာဝန်ထမ်းဆောင်နေတဲ့ ရဲဘော်သျားရယ်ဟာ ဧပြီ ၉ ရက်နေ့ မနက် ၉ နာရီဝန်းကျင်အချိန်က ရှေ့တန်းတနေရာမှာ စစ်ကောင်စီက ပစ်ခတ်လိုက်တဲ့ လက်နက်ကြီးထိမှန် ဒဏ်ရာအပြင်းအထန်ရခဲ့ပြီး ဧပြီလ ၁၀ ရက်နေ့ မနက် ၂ နာရီ အချိန်မှာ ကျဆုံးသွားခဲ့တာပါ။
တိုင်းပြည်နဲ့ လူမျိုးအတွက် စွမ်းစွမ်းတမံတာဝန်ထမ်းဆောင်ရင်းကျဆုံးသွားတဲ့ ရဲဘော်သျှားရယ်အား အာဇာနီ သူရဲကောင်းအဖြစ် အလေးနီပြုဦးညွှတ်ရင်း မှတ်တမ်းတင် ဂုဏ်ပြုထားပါတယ်။
အာဏာသိမ်းပြီးနောက် စစ်ကောင်စီရဲ့ ထိုးစစ်ဆင်တိုက်ခိုက်မှုတွေကို ကာကွယ်ရင်း ကရင်နီဒေသခံကာကွယ်ရေးတပ်ဖွဲ့ဝင် ၁၀၁ ဦးနဲ့ KNDF တပ်ဖွဲ့က ၃၆ ဦးကျဆုံးတယ်လို့ ဧပြီလ ၃ ရက်နေ့မှာ တိုးတက်သောကရင်နီပြည်သူ့အင်အားစု (PKPF) က ထုတ်ပြန်ထားပါတယ်။
