ကိုဗစ်-၁၉ ကပ်ရောဂါအတွက် စီမံကိန်းအသစ်ကို ကမ္ဘာ့ကျန်းမာရေးအဖွဲ့ကြီး (WHO) က မတ် ၃၀ ရက်မှာ ထုတ်ပြန်လိုက်ပါတယ်။
"ဒီနှစ်ထဲမှာ ကပ်ဘေးက ဘယ်လို တိုးတက်ပြောင်းလဲလာမလဲ ဆိုတာနဲ့ ပတ်သက်ပြီး ဖြစ်နိုင်ချေရှိတဲ့ အနာဂတ် ခန့်မှန်းခြေ သုံးရပ်ကိုလည်း တွက်ပြထားပါတယ်။ ကျနော်တို့ အခု သိထားတာကို အခြေခံပြီး ဖြစ်နိုင်ချေအရှိဆုံး အနာဂတ် မှန်းခြေကတော့ ကိုဗစ်-၁၉ ဗိုင်းရပ်စ်ဟာ ဆက်ပြီး အဆင့်ဆင့် သန္ဓေပြောင်းနေလိမ့်မယ်။ ဒါပေမဲ့ ကူးစက်မှုနဲ့ ကာကွယ်ဆေးတွေကြောင့် ရောဂါခုခံနိုင်တဲ့စနစ်ကလည်း တိုးလာလို့ အချိန်နဲ့အမျှ ရောဂါပြင်းထန်မှုက လျော့သွားလိမ့်မယ်" လို့ WHO ညွှန်ကြားရေးမှူးချုပ် တေဒရို အဒ်ဒါနွန် ဂေဘရီယေးဆပ်က လုပ်ငန်းစဉ် အသေးစိတ် ရှင်းလင်းညွှန်ကြားရေး အစည်းအဝေးအတွင်း ပြောပါတယ်။
ဗျူဟာမြောက် ပြင်ဆင်ရေး အသင့်ဖြစ်ရေးနဲ့ တုံပြန်ရေး စီမံကိန်းအသစ်အရ SARS-CoV-2 ကူးစက်စေတဲ့ အကြောင်းရင်းတွေကို ရင်ဆိုင်ဖို့၊ ကူးစက်ကပ်ဘေး သက်ရောက်မှု လျှော့ချဖို့နဲ့ ကမ္ဘာလုံးဆိုင်ရာ အရေးပေါ်အခြေအနေ အဆုံးသတ်ဖို့ နိုင်ငံတိုင်းက လုပ်ဖို့လိုတဲ့ ဗျူဟာမြောက် ပြုပြင်ပြောင်းလဲမှုတွေကို စတင် ချမှတ်ထားပါတယ်။
