ကယားပြည်နယ် လွိုင်ကော်မြို့နဲ့ ဒီးမော့ဆိုကြားက စံပြ ၆ မိုင်အုပ်စု၊ ကယောပိုင်းကျေးရွာမှာ လွန်ခဲ့တဲ့ ၂ လလောက်က စစ်ကောင်စီတပ်ဖွဲ့တွေ ဖမ်းဆီးသတ်ဖြတ်ခဲ့တဲ့ ပြည်သူ ၅ ဦးအနက် ၃ ဦးရဲ့ အရိုးတွေကို ကရင်နီပြည်သူ့ကာကွယ်ရေးတပ်ဖွဲ့ (KNDF) တပ်ရင်း ၉ က မတ် ၂၃ ရက်နေ့မှာ ပြန်လည်တွေ့ရှိခဲ့တယ်လို့ သိရပါတယ်။

စစ်ကောင်စီက ဖမ်းဆီးသတ်ဖြတ်ခဲ့တဲ့ ပြည်သူ ၅ ဦးဟာ ၆ မိုင်စံပြအုပ်စု၊ ကယောပိုင်းကျေးရွာမှာ နေထိုင်သူတွေဖြစ်ပြီး စစ်ဘေးရှောင်ရင်း ရွာကို ရိက္ခာပြန်ယူတဲ့အချိန် ဖမ်းဆီးသတ်ဖြတ်ခံလိုက်ရတာလို့ KNDF B-09 တပ်ဖွဲ့ရဲ့ တာဝန်ရှိသူတဦးက ဒီဗွီဘီကို ပြောပါတယ်။

ကရင်နီပြည်သူ့ကာကွယ်ရေးတပ်ဖွဲ့ KNDF B-09 ရဲဘော်တချို့က တွေ့ရှိခဲ့တဲ့ ပြည်သူ ၃ ဦးရဲ့ အရိုးစုတွေကို ကောင်းမွန်စွာ ပြန်လည်သင်္ဂြိုဟ်ပေးခဲ့တယ်လို့ ဆိုပါတယ်။

ကျန်ရှိနေသေးတဲ့ မတရားဖမ်းဆီး သတ်ဖြတ်ခံလိုက်ရတဲ့ ပြည်သူနှစ်ဦးရဲ့ ရုပ်အလောင်းတွေကိုလည်း ဆက်လက်ရှာဖွေသွားမယ်လို့ ပြောပါတယ်။