ပဲခူးတိုင်း၊ ပြည်မြို့နယ်၊ ပေါင်းတလည်မြို့မှာ ဖေဖေါ်ဝါရီ ၁၇ ရက်က ကိုဗစ်စစ်ဆေးခဲ့ရာမှာ ဆရာ၊ ဆရာမ ၄ ယောက် ကိုဗစ်-၁၉ ရောဂါပိုးတွေ့ရှိခဲ့ပေမဲ့သူတို့ကို အိမ်ပြန်နားခိုင်းပြီး ကျောင်းကိုတော့ ဆက်လက်ဖွင့်ထားတယ်လို့ မြို့နယ်ပြည်သူ့ကျန်းမာရေးဌာနကနေ သိရပါတယ်။
မြို့ခံကျောင်းသားမိဘ တယောက်က “အခုပိုးတွေ့တဲ့ ဆရာတွေက ၅ တန်းနဲ့ ၆ တန်းတွေကိုသင်ကြတာ။ အဲ့ဒိ ၅ တန်းနဲ့ ၆ တန်းကလည်း အခန်းခြင်းကပ်လျှက်ပဲ။ ဘေးမှာလည်း ဆရာနားနေခန်းကလည်း တခန်းထဲရယ်။ အခုထိကျောင်းကိုတော့ ပိတ်မပေးဘူး ဆက်တက်ခိုင်းတယ်။ ဒါပေမဲ့ ကျနော်ကတော့ သားကို ကျောင်းမတက်ခိုင်တော့ဘူး။ ပြည်မြို့ဘက်မှာလဲ အရမ်းအဖြစ်များနေတာ အိုမီခရွန်ပဲ ဖြစ်မှာ အိမ်က သားကလဲ ၆ တန်းတက်နေတာ စိတ်မချဘူး”လို့ ပြောပါတယ်။
ဆရာမတယောက်က အိမ်မှာနေရင်း ရောဂါကူးစက်ခံရတာဖြစ်ပြီး ကျောင်းမလာတော့ဘဲ ကျောင်းကို လှမ်းအကြောင်းကြားလိုက်ချိန်မှာ ကျောင်းမှာရှိတဲ့ဆရာတွေကို စစ်ကြည့်ရာမှာ အခုလို ဆရာ ၂ ယောက် နဲ့ ဆရာမ ၁ ယောက်မှာ ပါထပ်ပြီး ရောဂါတွေ့ရှိခဲ့တာပါ။
ရောဂါကူးစက်ခံရတဲ့ ဆရာတွေက ပေါင်းတလည်မြို့၊ ချောင်းကောင်းရွာနဲ့ ဒွရွာတွေက ဖြစ်ပြီး သူတို့ကို အိမ်တွေမှာ မိသားစုက စောင့်ရှောက်ထားတယ်လို့သိရပါတယ်။
ပေါင်းတလည်အထကမှာ လတ်တလောကျောင်းတက်နေတဲ့ ကျောင်းသား/သူ ၄၀၀ ကျော်ခန့်ရှိပြီး အခုလို ရောဂါကူးစက်မှုတွေရှိနေတဲ့ အတွက် ကျောင်းသားမိဘအများစုက ကလေးတွေကို ကျောင်းကိုမပို့ကြတော့ပါဘူး။
ဒါ့အပြင် ပြည်-ပေါင်းတလည်-ပေါက်ခေါင်း ပြေးဆွဲနေတဲ့ ကားဂိတ်မှာလည်း ကိုဗစ်-၁၉ စစ်ဆေးရာမှာ အမျိုးသားတယောက်နဲ့ အမျိုးသမီးတယောက်တို့မှာ ပိုးတွေ့ရှိခဲ့ပါတယ်။
