မကွေးတိုင်း တောင်တွင်းကြီးမြို့၊ ပြည်လမ်းပေါ်မှာရှိတဲ့ CB Bank က ဝန်ထမ်းအမျိုးသမီး ၁ ဦးကို ဒီဇင်ဘာ ၁၇ ရက် နေ့လယ်ပိုင်းက ရုံးတက်နေစဉ် စစ်ကောင်စီတပ်က ဘဏ်အတွင်းဝင်ရောက် ဖမ်းဆီးသွားတယ်လို့ သိရပါတယ်။
CB Bank ဝန်ထမ်းတဦးက ''စစ်သားတွေ ၂၀ လောက်ရှိမယ်။ သေနတ်တွေနဲ့ ဘဏ်ထဲဝင်လာပြီး မနှင်းနုဝေကို ဖမ်းသွားတယ်။ ရုံးတက်နေချိန်ဆိုတော့ ယူနီဖောင်းနဲ့ ပါသွားတာ'' လို့ ပြောပါတယ်။
ဖမ်းဆီးခံရသူဟာ မနှင်းနုဝေဟာ တောင်တွင်းကြီးမြို့၊ မောင်းတိုင် ၂ ရပ်ကွက်၊ အသောကလမ်းမှာ နေထိုင်သူဖြစ်တယ်လို့ ဒေသခံတွေက ပြောပါတယ်။
မနှင်းနုဝေဟာ ဒီဇင်ဘာ ၁၀ ရက် လူ့အခွင့်အရေးနေ့က လက်သုံးချောင်းထောင်ပြီး သူ့ရဲ့ လူမှုကွန်ရက်စာမျက်နှာတင်ခဲ့တာကြောင့် ဖမ်းဆီးခံရတာ ဖြစ်နိုင်တယ်လို့ လုပ်ဖော်ကိုင်ဖက်တွေက မှန်းဆကြပါတယ်။
အလားတူ တောင်တွင်းကြီးမြို့နယ် တလုပ်ကုန်းကျေးရွာအုပ်စု၊ နှစ်ကျပ်ခွဲကျေးရွာက ကိုရှောလမုံ နဲ့ ကိုရာကျော်တို့ ၂ ဦးကိုလည်း စစ်ကောင်စီတပ်သားတွေက ဒီဇင်ဘာ ၁၇ ရက်နေ့မှာ ဖမ်းဆီးသွားပြီး ဒီဇင်ဘာ ၁၉ ရက်အထိ မိသားစုနဲ့ အဆက်အသွယ်မရဘူးလို့ မိသားစုနဲ့နီးစပ်သူတွေဆီက သိရပါတယ်။
ဖမ်းဆီးခံရသူတွေနဲ့ပတ်သက်လို့ အသေးစိတ်သိရှိနိုင်ဖို့ တောင်တွင်းကြီးမြို့မရဲစခန်းကို ဆက်သွယ်ရာမှာ တာဝန်ကျရဲတစ်ဦးက ''CB ဘဏ်ကအမျိုးသမီးကတော့ မနေ့ကတည်းက စခန်းကိုရောက်လာပါပြီ။ ရွာသား ၂ ယောက်ကတော့ မသိဘူးဗျ။ မရောက်သေးဘူး။ စစ်ကြောရေးမှာ ရှိမှာပေါ့။ အဲဒီကို ဆက်သွယ်မေးကြည့်ပါ'' လို့ ပြောပါတယ်။
