မကွေးတိုင်း၊ တောင်တွင်းကြီးမြို့နယ်၊ ဆတ်သွားကျေးရွာ၊ တိုက်နယ်ရဲစခန်းက နယ်ထိန်းအဆင့်ရှိသူ အောင်နန်းဦးဟာ ဒီဇင်ဘာ ၁၈ ရက်နေ့ ညနေ ၃ နာရီခွဲဝန်းကျင်က လုပ်ကြံခံလိုက်ရတယ်လို့ သိရပါတယ်။

ဆတ်သွားဒေသခံတဦးက ''ဆတ်သွားက ပြည်လမ်းမပေါ်မှာလုပ်ကြံခံရတာ။ ဗိုက်ကအူတွေထွက်ပြီး ဆုံးသွားပြီတဲ့။ သစ်ကိစ္စတွေ၊ လောင်းကစားကိစ္စတွေကနေ ငွေတောင်းတဲ့ကိစ္စတွေကနေ ဖြစ်လာတဲ့အကျိုးဆက်ဖြစ်မှာပေါ့။ ဆတ်သွားက အေးချမ်းပါတယ်။ ဘာ PDF မှမရှိဘူး'' လို့ ပြောပါတယ်။

နယ်ထိန်း အောင်နန်းဦး လုပ်ကြံခံရတာနဲ့ပတ်သက်ပြီး အသေးစိတ်သိရှိနိုင်ဖို့ ဆတ်သွားနယ်မြေ ရဲစခန်းနဲ့ တောင်တွင်းကြီးမြို့မရဲစခန်းကို အကြိမ်ကြိမ်ဆက်သွယ်ခဲ့ပေမယ့် ဖုန်းလက်ခံဖြေဆိုခြင်း မရှိပါဘူး။

ညနေ ၄ နာရီဝန်းကျင်မှာ သေဆုံးသူရဲ့ရုပ်အလောင်းကို တောင်တွင်းကြီးဆေးရုံက ရင်ခွဲရုံကို ပို့ဆောင်နေတယ်လို့ ဆတ်သွားရဲစခန်းနဲ့ နီးစပ်တဲ့အသိုင်းအဝိုင်းကနေ သိရပါတယ်။

အဆိုပါ နယ်ထိန်းအောင်နန်းဦး လုပ်ကြံခံရမှုဟာ ဒေသခံကာကွယ်ရေးအဖွဲ့တွေနဲ့ မသက်ဆိုင်ကြောင်း ဒေသခံကာကွယ်ရေးအဖွဲ့တွေက ငြင်းဆိုထားပါတယ်။

စစ်တပ်ကအာဏာသိမ်းပြီးနောက် မတ်လ ၂ ရက်က တောင်တွင်းကြီးမြို့နယ်၊ ဆတ်သွား ကျေးရွာနေ အသက် ၁၆ နှစ်အရွယ် လူငယ်တဦးဟာ စစ်ကောင်စီတပ်သားတွေရဲ့ ပစ်ခတ်မှုကြောင့် သေဆုံးခဲ့ရဖူးပါတယ်။