မကွေးတိုင်း၊ တောင်တွင်းကြီးမြို့မှာ ဒီဇင်ဘာ ၁၀ ရက်၊ လူ့အခွင့်အရေးနေ့မနက်ပိုင်းက ဗုံး ၂ လုံးပေါက်ကွဲပြီး သုံးဘီးမောင်းသမား ၁ ဦး ဒဏ်ရာရရှိသွားတယ်လို့ သိရပါတယ်။
ဒေသခံတဦးက “မနက် ၇ နာရီလောက်က လေးကျွန်းအောင်မြေဘုရားနားမှာ။ ၈ နာရီလောက်ကျတော့ မြို့ရဲ့မြောက်အထွက်ဂိတ်နားမှာပေါက်တာက သုံးဘီးဆရာ ၁ ယောက်ထိသွားတယ်” လို့ ပြောပါတယ်။
ဗုံးစထိမှန်တဲ့ သုံးဘီးဆရာကိုတော့ တောင်တွင်းကြီးဆေးရုံမှာ ကုသပေးနေပြီး မစိုးရိမ်ရဘူးလို့ ဆေးရုံနဲ့နီးစပ်သူတွေဆီက သိရပါတယ်။
“ခင်ဗျားတို့သတင်းရတာကလည်း တိကျပြီးမြန်လိုက်တာ။ ဗိုလ်မှူးတို့က အဲ့ဒိသတင်းကို အပြင်မထွက်စေချင်ဘူး။ ဖုံးထားတယ်ပေါ့ဗျာ” လို့ မြို့နယ်စစ်ကောင်စီနဲ့နီးစပ်တဲ့ဝန်ထမ်းတဦးက ပြောပါတယ်။
အဆိုပါဗုံးခွဲတိုက်ခိုက်မှုကို ဒေသခံပြည်သူ့ကာကွယ်ရေးတပ်ဖွဲ့တွေက လုပ်ဆောင်ခဲ့တာ မဟုတ်ကြောင်း ဒီဗွီဘီရဲ့မေးမြန်းမှုအပေါ်ပြန်လည်ဖြေကြားခဲ့ကြပါတယ်။
ဒေသခံတဦးက “၉ ရက်နေ့ည ၁၀ ခွဲ လောက်မှာ စစ်ကောင်စီက ကားတွေပေါ်လော်ကြီးတင်ပြီး ဆိုင်တွေမပိတ်ဖို့၊ ပြည်သူတွေပုံမှန်အလုပ်လုပ်ကြဖို့လည်း အော်ခဲ့တာ။ မနက်ကျ ဗုံးပေါက်တဲ့အသံကြားတာပဲ။ စစ်ကောင်စီက ဗုံးခွဲမယ့်အကြံရှိလို့ ပြည်သူတွေကို အပြင်ထွက်ခိုင်းနေတာ။ စစ်ကောင်စီရဲ့ ထောင်ချောက်ထဲဝင်မသွားတာ ပြည်သူတွေကံကောင်းတယ်” လို့ ပြောပါတယ်။
ဒီဇင်ဘာ ၁၀ ရက်နေ့ လူ့အခွင့်အရေးနေ့ ညနေမှာလည်း ဒေသခံပြည်သူ ၄ ဦးကို လက်ခုပ်တီးတယ်လို့ စွပ်စွဲဖမ်းဆီး ညှဉ်းပမ်းရိုက်နှက်ပြီး ညဦးပိုင်းမှာ ပြန်လွှတ်လိုက်တယ်လို့ ဖမ်းဆီးခံရသူတွေရဲ့ နီးစပ်သူတွေက ပြောပါတယ်။
တောင်တွင်းကြီးမြို့မှာ စစ်ကောင်စီဝင်တွေဟာ အရပ်ဝတ်တွေဝတ်ဆင်ပြီး အရပ်သားအသွင်ယူပြီး သတင်းစုံစမ်းတာတွေ၊ မှတ်တမ်းဓာတ်ပုံရိုက်ယူတာတွေအပြင် အသက် ၁၈ နှစ်မပြည့်သေးတဲ့ တပ်မိသားစုဝင်တွေကိုပါ စစ်ယူနီဖောင်းဝတ်၊ သေနတ်ကိုင်ခိုင်းပြီး မြို့ပေါ်လူစည်ကားရာနေရာတွေမှာ ကင်းစောင့်နေကြတယ်လို့ ဒေသခံတွေရဲ့ပြောပြချက်အရ သိရပါတယ်။
