စစ်ကိုင်းတိုင်းဒေသကြီး၊ မြောင်မြို့နယ်ရဲ့ မြို့အဝင်အထွက်စစ်ဆေးရေးဂိတ်တွေမှာ မြောင်မြို့နယ်ပြည်သူ့ကာကွယ်ရေးနှင့် လုံခြုံရေးအဖွဲ့ (CDSOM) က ဒီကနေ့ ဒီဇင်ဘာ ၄ ရက် နေ့ကစတင်ပြီး စစ်ဆေးမှုတွေ ပြုလုပ်သွားမယ်လို့ သိရပါတယ်။
မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့ တာဝန်ရှိသူတဦးက ''စစ်ကိုင်းဘက်ကလာတဲ့ မြောင်မြို့အဝင်ဂိတ်ကို "နတ်မြင်းဂိတ်"၊ မြောင်အရှေ့ဘက်ပိုင်းကို "မင်းယက္ခနှင့်ဆင်ရိုင်းဂိတ်"၊ မြောင်တောင်ပိုင်းကျွန်းထဲအရပ်ကို "ဗိုလ်ကျားသစ်ဂိတ်"၊ မြောင်အနောက်ခြမ်း ကုန်းမြေကို "ခြင်္သေ့မင်းဂိတ်" နဲ့ ချင်းတွင်းမြစ်ကြောင်းကို "နှလုံးလှဂိတ်" တွေလို့ သတ်မှတ်ထားပြီး စစ်ဆေးမှုကို ငြင်းဆန်ရင် ဂိတ်မှူးတွေက ထိထိရောက်ရောက် အရေးယူသွားမယ်'' လို့ ရှင်းလင်းပြောပြပါတယ်။
CDSOM က သတ်မှတ်ထားတဲ့ စစ်ဆေးရေးဂိတ်တွေမှာ စစ်ဆေးရမိတဲ့ စစ်ကောင်စီတပ်နဲ့ဆက်နွှယ်ပတ်သက်တဲ့ ထုတ်ကုန်ပစ္စည်းတွေကို ပြည်သူပိုင်အဖြစ် ထိန်းသိမ်းသွားမှာဖြစ်ပြီး ထိန်းသိမ်းပစ္စည်းရမိတဲ့ပစ္စည်းတွေကို ပြည်သူ့ကာကွယ်ရေးအသုံးစရိတ်နဲ့ မြို့နယ်သူ၊ မြို့နယ်သားတွေရဲ့ အသုံးစရိတ်တွေအဖြစ် ခွဲဝေသုံးစွဲသွားမယ်လို့ ဆိုပါတယ်။
CDSOM အဖွဲ့ရဲ့ မြို့အဝင်အထွက်ဂိတ်တွေမှာ စစ်ဆေးမှုပြုလုပ်ရာမှာလည်း ဒေသခံပြည်သူတွေဆီက ဆက်ကြေးကောက်ခံတာ၊ လာဘ်ပေး၊ လာဘ်ယူပြုလုပ်တာတွေကို လုံးဝပြုလုပ်သွာမှာမဟုတ်ဘူးလို့ သိရပါတယ်။
ဒီဇင်ဘာ ၃ ရက်နေ့ကလည်း မြောင်ပြည်သူ့ကာကွယ်ရေးနှင့် လုံခြုံရေးတပ်ဖွဲ့က စစ်ဆေးတွေ စတင်လုပ်ဆောင်ခဲ့ရာမှာ ချင်းတွင်းမြစ်ကြောင်းအတိုင်း မန္တလေးကနေ မုံရွာမြို့ဘက်ကို ဆန်တက်လာတဲ့ စစ်ကောင်စီတပ်ရဲ့ ရွှေဂျိုးဖြူ ဆီတင်သင်္ဘောနဲ့ BOC သင်္ဘောတို့ကို နှလုံးလှဂိတ်က တာဝန်ရှိသူတွေက ထိန်းသိမ်းခဲ့ပါတယ်။
