အမျိုးသားဒီမိုကရေစီအဖွဲ့ချုပ်(အန်အယ်လ်ဒီ) လွှတ်တော်အမတ်လည်းဖြစ် ဟစ်ဟော့ပ် အဆိုတော်လည်းဖြစ်တဲ့ ဦးဖြိုးဇေယျာသော်ကို နိုဝင်ဘာ ၁၈ ရက် ဒီနေ့ နေ့လယ်ပိုင်းမှာ အကြမ်းဖက်စစ်ကောင်စီတပ်တွေက ဖမ်းဆီးသွားတယ်ဆိုတဲ့ သတင်းတွေ ထွက်ပေါ်နေပါတယ်။
ဦးဖြိုးဇေယျာသော်ကို စစ်ကောင်စီက ဖမ်းဆီးသွားခဲ့တယ်လို့ ရန်ကုန်တိုင်းစစ်ဒေသနဲ့ နီးစပ်သူတွေက အတည်ပြုပြောပေမဲ့ ဒီဗွီဘီအနေနဲ့ သီးခြား အတည်မပြုနိုင်သေးပါဘူး။
ဒီကနေ့ ဦးဖြိုးဇေယျာသော်ဟာ သူတက်ရမယ့်အစည်းအဝေးတွေ မတက်ခဲ့ဘဲ နေ့လယ်ပိုင်းကတည်းက အဆက်သွယ်ပြတ်သွားတယ်လို့ သူနဲ့ နီးစပ်သူတွေက ဆိုပါတယ်။
ဒီနေ့ ဒဂုံဆိပ်ကမ်းမြို့နယ်၊ ရတနာနှင်းဆီအိမ်ရာကို လက်နက်ကိုင်စစ်သားတွေ အပြည့်တင်လာတဲ့ စစ်ကားအသေး အစီး ၂၀ လောက်၊ စစ်ကားကြီး ၉ စီးလောက်နဲ့ ညနေ ၃ နာရီလောက်မှာ ဝင်စီးခဲ့ပြီး ၄ နာရီခွဲလောက်မှာ ပြန်ထွက်သွားကာ ခေါင်းစွပ်ပြီးဖမ်းခေါ်သွားတဲ့သူရှိတယ်လို့ အနီးနားမှာ နေထိုင်တဲ့ ဒေသခံ တဦးက ပြောပါတယ်။
ဒါပေမဲ့ အဆိုပါ ဖမ်းဆီးခံရသူဟာ ဦးဖြိုးဇေယျာသော်လား တခြားသူ တဦးလားဆိုတာတော့ ပြောဖို့ခက်တယ်လို့ဆိုပါတယ်။
ရန်ကုန်မှာလတ်တလော ဖြစ်ပွားနေတဲ့ ပစ်ခတ်တိုက်ခိုက်မှုတွေအားလုံးကို ဦးဖြိုးဇေယျာသော်က ခိုင်းစေခဲ့တာဆိုပြီး စစ်ကောင်စီက အမြဲလိုလို စွပ်စွဲထုတ်ပြန်လေ့ရှိပြီး အခုဖမ်းဆီးမှုနဲ့ပတ်သက်လို့တော့ စစ်ကောင်စီက ထုတ်ပြန်ခြင်းမရှိသေးပါဘူး။
ဦးဖြိုးဇေယျာသော်ကို ပရိသတ်တွေက နိုင်ငံရေးအကျဉ်းသားဟောင်း လူငယ်ဟစ်ပ်ဟော့ပ် အဆိုတော်တယောက်အနေနဲ့ သိထားကြတာ ဖြစ်ပြီး သူဟာ ပြီးခဲ့တဲ့ ၂၀၁၂ ခုနှစ် ကြားဖြတ်ရွေးကောက်ပွဲမှာ အမျိုးသားဒီမိုကရေစီအဖွဲ့ချုပ်(အန်အယ်လ်ဒီ)ပါတီကို ကိုယ် စားပြုပြီး နေပြည်တော် ပုဗ္ဗသီရီမြို့နယ်မှ ဝင်ရောက်ယှဉ်ပြိုင် အနိုင်ရကာ ပြည်သူ့ လွှတ် တော်အမတ် ဖြစ်လာခဲ့တာပါ။
အဲဒီနောက် ၂၀၁၅ ခုနှစ် ရွေးကောက်ပွဲမှာလည်း နေပြည်တော်ရှိ အစိုးရဝန်ထမ်းတွေ အများဆုံးနေထိုင်ရာ ဇဗ္ဗူသီရိမြို့နယ်မှ အန်အယ်လ်ဒီပါတီ ကိုယ်စားပြုအနေနဲ့ ထပ်မံ ဝင်ရောက်ယှဉ်ပြိုင်ခဲ့ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးတိုးတက်ရေးပါတီမှ လေတပ် ဦးစီးချုပ်ဟောင်းနဲ့ ဆက်သွယ်ရေးဝန်ကြီးဟောင်း ဦးမြတ်ဟိန်းကို အနိုင်ရခဲ့တာ ဖြစ်ပါတယ်။
