မကွေးတိုင်း၊ ဆင်ပေါင်ဝဲမြို့နယ် NLD ပြည်သူ့လွှတ်တော်ကိုယ်စားလှယ်တဦး အမွေပြတ်စွန့်လွှတ်ခံရတယ်လို့ သိရပါတယ်။

မကွေးတိုင်း၊ ဆင်ပေါင်ဝဲမြို့နယ်၊ ကိုးပင်ကျေးရွာ၊ စိမ်းရောင်စိုစိုက်ပျိုးဥယျာဉ်နေထိုင်တဲ့ ဒေါ်အေးမြင့်က သားဖြစ်သူ ဆင်ပေါင်ဝဲမြို့နယ်၊ ပြည်သူ့လွှတ်တော်ကိုယ်စားလှယ် ဦးနေထက်ဝင်းကို အမွေပြတ်စွန့်လွှတ်လိုက်တာလို့ စစ်ကောင်စီလက်အောက်ခံ သတင်းစာတစောင်မှာ နိုဝင်ဘာလ ၁၇ ရက်နေ့က ထည့်သွင်းကြေညာခဲ့တာလည်း ဖြစ်ပါတယ်။

အမွေပြတ်စွန့်လွှတ်ခံရတဲ့ ဦးနေထက်ဝင်းက “သံယောဇဉ်လက်ကျန်တွေ မရှိတော့ဘူးဆိုရင်တောင် ဒီတော်လှန်ရေးမှာ အဆုံးထိပါဝင်ဆင်နွှဲရင်း လိပ်ပြာသန့်စွာနဲ့ အဆုံးထိ ယုံကြည်ရာလမ်းကို ဆက်လျှောက်သွားမှာပါ” လို့ ပြောပါတယ်။

ဦးနေထက်ဝင်းဟာ အမျိုးသားဒီမိုကရေစီအဖွဲ့ချုပ်ရဲ့ ပြည်သူ့လွှတ်တော်ကိုယ်စားလှယ်အဖြစ် ၂၀၁၅ ခုနှစ်နဲ့ ၂၀၂၀ ပြည့်နှစ် ပါတီစုံအထွေထွေရွေးကောက်ပွဲတွေမှာ အနိုင်ရရှိခဲ့သူလည်း ဖြစ်ပါတယ်။