မကွေးတိုင်း၊ နတ်မောက်မြို့ရှိ မြို့မဈေးကြီးမှာ နိုဝင်ဘာ ၁၃ ရက် ည ၉ နာရီခွဲဝန်းကျင်က မီးလောင်ကျွမ်းမှု ဖြစ်ပွားခဲ့ရာမှာ ဆိုင်ခန်းပေါင်း ၉၀ ရာခိုင်နှုန်းနီးပါး မီးဘေးသင့်ခဲ့တယ်လို့ မြို့နယ်မီးသတ်စခန်းကနေ သိရပါတယ်။
မြို့မဈေးမှာ ဆိုင်ခန်းပေါင်း ၂၇၀ နီးပါးရှိတဲ့အထဲက ဆိုင်ခန်းပေါင်း ၂၄၀ ကျော် မီးလောင်ကျွမ်းခဲ့တာ ဖြစ်ပါတယ်။
နတ်မောက်မြို့မဈေးကြီးမှာရှိတဲ့ ဆိုင်ခန်းအများစုမီးလောင်ခံရပြီး အပြင်ဘက်တိုက်တန်းတွေသာ ကျန်ရစ်ကာ မီးမလောင်ဘဲကျန်နေတဲ့ ဆိုင်ခန်းတွေထဲက ပစ္စည်းတွေဟာလည်း သုံးမရလောက်အောင် ပျက်စီးသွားနိုင်တယ်လို့ ဒေသခံတွေက ပြောပါတယ်။
မြို့မဈေးမှာ နိုဝင်ဘာ ၁၃ ရက်နေ့ည ၉ နာရီ ၄၃ မိနစ်က စတင်မီးလောင်ကျွမ်းခဲ့တာဖြစ်ပြီး နတ်မောက်မြို့နယ်မီးသတ်စခန်းက မီးသတ်ယာဉ် ၄ စီး၊ မြို့သစ်မြို့နယ်မီးသတ်စခန်းမှ မီးသတ်ယာဉ် ၂ စီး၊ တောင်တွင်းကြီးမြို့နယ်မီးသတ်စခန်းက မီးသတ်ယာဉ် ၂ စီး ထွက်ခွာငြှိမ်းသတ်ခဲ့တာ ဖြစ်ပါတယ်။
မီးလောင်မှုကို မနေ့ည ၁၁ နာရီ ၁၅ မိနစ်မှာ မီးထိန်းနိုင်ခဲ့ပြီး ည ၁၁ နာရီ ၄၅ မိနစ်လောက် မီးငြိမ်းသွားတယ်လို့ မြန်မာနိုင်ငံ မီးသတ်တပ်ဖွဲ့က သတင်းထုတ်ပါတယ်။
မြို့မဈေးကြီးရဲ့ မြောက်ဘက်အလယ်အပေါက်က စတင်လောင်ကျွမ်းတာလို့ ဒေသခံတွေဆီက သိရပြီး မီးစတင်လောင်ရခြင်း အကြောင်းရင်းနဲ့ မီးလောင်ဆုံးရှုံးမှု တန်ဖိုးပမာဏကိုတော့ မသိရသေးပါဘူး။
