တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ်အတွင်း တိုက်ပွဲကြောင့် ထွက်ပြေးနေရတဲ့ စစ်ရှောင်ပြည်သူတွေ ရိက္ခာနဲ့ ဆေးဝါးတွေ အရေးပေါ်အကူအညီလိုအပ်နေတယ်လို့ သိရပါတယ်။

ပြီးခဲ့တဲ့ နိုဝင်ဘာ ၃ ရက်၊ မနက် ၇ နာရီအချိန်လောက်ကပြီး  အကြမ်းဖက်စစ်ကောင်စီတပ်နဲ့ ဒေသပြည်သူကာကွယ်ရေးတပ်တွေရဲ့ ထိတွေ့ပစ်ခတ်မှုတွေကြောင့် ဒေသခံပြည်သူတွေ ထွက်ပြေးတိမ်းရှောင်နေကြရတာပါ။

လက်ရှိအချိန်မှာ သစ်ကတိုး၊ လေးအိမ်စု၊ မြေးခန္တီကျေးရွာတွေက ပြည်သူ ၃၀၀ လောက် ​ရှောင်တိမ်းနေကြရပြီး ရိက္ခာနဲ့ ဆေးဝါးအကူအညီ အရေးတကြီးလိုအပ်နေတယ်လို့  ဒီမိုကရေစီအရေး လှုပ်ရှားမှု  သပိတ်ကော်မတီ(ထားဝယ်ခရိုင်) တာဝန်ရှိသူတဦးက ပြောပါတယ်။

ဒါ့အပြင် ထားဝယ်ခရိုင်၊ သရက်ချောင်းမြို့နယ်၊ တောင်ပျောက်တိုက်နယ်အတွင်း ဒေသခံပြည်သူ့ကာကွယ်ရေးတပ်တစ်ခုဖြစ်တဲ့ ဒေါင်းမင်းစစ်ဆင်ရေးတပ်ဖွဲ့ဝင်တွေနဲ့ အကြမ်းဖက်စစ်ကောင်စီတပ်တွေရဲ့ ထိတွေ့ပစ်ခတ်မှုတွေကြောင့် ပြည်သူထောင်ချီ ​ရှောင်တိမ်းနေကြရပြီး ရိက္ခာနဲ့ ဆေးဝါးတွေ အရေးတကြီး လိုအပ်နေတယ်လို့ ဆိုပါတယ်။

ပြည်သူတွေအနေနဲ့ စစ်ဘေးရှောင်ပြည်သူတွေအတွက် ရိက္ခာနဲ့ဆေးဝါးများ ကူညီထောက်ပံ့နိုင်ရေး အလှူငွေ ထည့်ဝင်လှူဒါန်းလိုပါက ထားဝယ်ခရိုင်သပိတ်ကော်မတီ https://www.facebook.com/Democracy-Movement-Strike-Committee-Dawei-101846808678327 ကတဆင့် ဆက်သွယ်လှူဒါန်းနိုင်ပါတယ်။