စစ်ကိုင်းတိုင်း မင်းကင်းမြို့မှာ အခြေခံပညာရေးကျောင်းတွေကို နိုဝင်ဘာလ (၁) ရက်နေ့ကတည်းက ဖွင့်လှစ်ခဲ့ပေမယ့် နိုဝင်ဘာလ ၃ နေ့အထိ ကျောင်းတက်သူအနည်းငယ်သာ ရှိတယ်လို့ သိရပါတယ်။
မင်းကင်းမြို့ အမှတ် (၁) နဲ့ အမှတ် (၂) အခြေခံ ပညာအထက်တန်းကျောင်းတို့ ဖွင့်လှစ်ထားပေမယ့် အမှတ် (၂) ကျောင်းမှာ တက်ရောက်သူမရှိပဲ အမှတ်(၁) ကျောင်းမှာ ကျောင်းသားကျောင်းသူ ၅၀၊ ၆၀ ဝန်းကျင်သာ ကျောင်းလာတက်ပြီး ရဲနှင့်စစ်သား လုံခြုံရေး တင်ကြပ်ထားတယ်လို့ ဆိုပါတယ်။
"အမှတ် (၂) ကျောင်းကတော့ မနေ့က လာအပ်တဲ့သူမရှိဘူးလို့ သိရတယ်။ ဒီနေ့တော့ အမှတ်(၁) ကျောင်းမှာ ၅၀-၆၀ ဝန်းကျင်လောက်တော့ရှိတယ်။ အခုဟာက ကျောင်းအပ် လက်ခံတာလို့ ပြောတယ်။ ရဲနဲ့စစ်သားတွေကတော့ လုံခြုံရေးယူထားတာ များတယ်။” လို့ မင်းကင်းမြို့နေပြည်သူတစ်ဦးက ပြောပါတယ်။
မင်းကင်းမြို့ဝန်းကျင်နဲ့ ကျေးရွာတချို့က အခြေခံပညာကျောင်းများမှာလည်း လာရောက် အပ်နှံသူ အနည်းငယ်သာရှိတယ်လို့လည်း သိရပါတယ်။
မြန်မာနိုင်ငံရှိ အခြေခံပညာကျောင်းတော်တော်များများကို နိုဝင်ဘာလ ၁ ရက်နေ့ ဖွင့်လှစ်ဖို့ စစ်ကောင်စီက ညွှန်ကြားထားပေမယ့် ကိုဗစ်ကူးဆက်မှု၊ မလုံခြုံမှုတို့ကြောင့် ပြည်သူတွေအနေနဲ့ စိုးရိမ်ပူပန်တာတွေ ရှိနေကြပါတယ်။
