မန္တလေးတိုင်း၊ မလှိုင်မြို့မှာ အောက်တိုဘာ ၁၁ ရက်မနက်က မြို့နယ်ထွေအုပ်ရုံးရှေ့မှာ ပန်းအိုင်ကျေးရွာအုပ်စု အုပ်ချုပ်ရေးမှူးနဲ့ စစ်မှုထမ်းဟောင်း တစ်ဦး သေနတ်နဲ့ ပစ်ခတ်ခံခဲ့ရတယ်လို့ ဒေသခံတွေက ပြောပါတယ်။

ဒေသခံတဦးက “သေနတ်သံအချက်တွေ အများကြီး ကြားရတယ်။ ကံဦးရွာမှာ နေတဲ့ ပန်းအိုင်ကျေးရွာအုပ်စု အုပ်ချုပ်ရေးမှူး  ဦးကျော်ငြိမ်းကတော့ နေရာတင် သေဆုံးတယ်။ စစ်မှုထမ်းဟောင်း ဦးကံမြင့်ကတော့ လက်မောင်းထိသွားတယ်” လို့ ပြောပါတယ်။

အမည်မသိလူတစုက သေနတ်နဲ့ ပစ်ခတ်ခဲ့တာဖြစ်ပြီး မိတ္ထီလာခရိုင်ထဲက ၄ မြို့နယ်မှာ ရပ်ကျေးအုပ်ချုပ်ရေးမှူးတစ်ဦး သေနတ်နဲ့ အပစ်ခံရတာ ပထမဆုံးဖြစ်ရပ်တစ်ခု ဖြစ်ပါတယ်။

အခင်းဖြစ်ပြီးတဲ့နောက် စစ်တပ်နဲ့ရဲတွေ ရောက်လာပြီး ပိုက်စိပ်တိုက် စစ်ဆေးရှာဖွေနေတယ်လို့ သိရပါတယ်။