မကွေးတိုင်း၊ ပွင့်ဖြူမြို့နယ်ထဲမှာ စက်တင်ဘာ ၂၉ ရက်နေ့က မုန်းချောင်း ရေတိုက်စားပြီး ကမ်းပါးပြိုကျတာကြောင့် နေအိမ် ၈ လုံးကို ဘေးလွတ်ရာသို့ ရွှေ့ပြောင်း ထားရတယ်လို့ ဒေသခံတွေဆီကနေ သိရပါတယ်။

ပွင့်ဖြူမြို့နယ်မှာ ဒီရက်ပိုင်းအတွင်း မိုးကြီးပြီးတော့ မုန်းချောင်းရေမြင့်တက်လာကာ ကမ်းပါး ပြိုကျတာကြောင့် နှောကျင်းရွာက နေအိမ် တစ်လုံး၊ ဇီးကျွန်းရွာကနေအိမ် ၃ လုံးနဲ့ ကျောင်းစု ကျေးရွာကနေအိမ် ၄ လုံးတို့ကို ဘေးလွတ်ရာသို့ အရေးပေါ်ရွှေ့ပြောင်းထားရတယ်လို့ ဒေသခံ တစ်ယောက်က ဒီဗွီဘီကို ပြောပါတယ်။

ကမ်းပြိုဘေးသင့် ပြည်သူ အယောက် ၃၀ ကျော်လောက်ကို နီးစပ်တဲ့ဆွေမျိုးတွေကနေ ကျွေးမွေး စောင့်ရှောက်ထားရပြီးတော့ အကူညီတွေလိုအပ်နေတယ်လို့ ဆိုပါတယ်။