မန္တလေးတိုင်း မြင်းခြံခရိုင် ငါန်းဇွန်မြို့နယ်အတွင်းရှိ ကျေးရွာတွေမှာ အပြစ်မဲ့ပြည်သူတချို့ ဖမ်းဆီးခံနေရတယ်လို့ ဒေသခံတွေက ပြောပါတယ်။
စက်တင်ဘာ ၉ ရက် ည ၁၂ နာရီအချိန်မှာ ငါန်းမြာရွာက ၁ ဦး၊ မိုးထောင်ရွာက ၄ ဦးတို့ကို စစ်ကောင်စီတပ်သားတွေက အရပ်ဝတ်တွေနဲ့ အိမ်တံခါးတွေကိုဖျက်ပြီး ဖမ်းဆီးခေါ်ဆောင်သွားကြပါတယ်။
“ဖမ်းဆီးခံရသူတွေက သာမာန် အရပ်သားတွေပါ။ မတရားဖမ်းဆီးတာပါ။ ဖမ်းဆီးခံရတာက အရွယ်ကောင်း ယောကျ်ားလေးတွေဖြစ်တော့ အနီးနားက ဒေသခံတွေကတော့ ဒါကို ပေါ်တာဆွဲတယ်ဆိုပြီးတောင် ပြောဆိုကြတာရှိတယ်” လို့ ဒေသခံတစ်ဦးက ပြောပါတယ်။
ဒါ့အပြင် ဒီကနေ့ စက်တင်ဘာ ၁၀ ရက် မနက်ပိုင်း ၈ နာရီဝန်းကျင်မှာ မိုးထောင်ရွာ ၁ ဦး ဖမ်းဆီးပြီး မနက်ပိုင်း ၁၁ နာရီလောက်မှာ ၂ ဦးတို့ကို ထပ်မံ ဖမ်းဆီးသွားတယ်လို့ သိရပါတယ်။
ဖမ်းဆီးခံရတဲ့အထဲမှာ စစ်ကောင်စီကခန့်ထားတဲ့ မိုးထောင်ကျေးရွာအုပ်စု အုပ်ချုပ်ရေးမှူးဖြစ်သူ ကိုသက်ခိုင်လည်း ပါဝင်ပြီး ဘယ်အကြောင်းကြောင့် ဖမ်းဆီးခံရလဲဆိုတာ မသိရဘူးလို့ ဆိုကြပါတယ်။
အခုလို အပြစ်မဲ့ပြည်သူတွေကို စစ်ကောင်စီတပ်သားတွေက မတရားဖမ်းဆီးတာတွေ လုပ်နေတဲ့အတွက် ကျေးရွာတချို့က ရွာသားများ ဘေးလွတ်ရာ ရှောင်တိမ်းရှောင်နေကြရပါတယ်။
