ပြည်မြို့၊ ကျောင်းကြီးအိုးတန်းရပ်ကွက်မှာ မနေ့ နေ့လယ်ပိုင်းလောက်က စစ်ကောင်စီရဲ့ ရိုက်နှက်ဖမ်းဆီးတာကို ခံရပြီး သေဆုံးသွားတဲ့ ကိုဇော်လင်းထက်ရဲ့ အမျိုးသမီးနဲ့ အစ်ကိုဖြစ်သူ ကို ဒီနေ့မနက်အစောပိုင်းမှာ စစ်ကောင်စီတပ်တွေက ထပ်မံဖမ်းဆီးသွားတယ်လို့ သိရပါတယ်။
နီးစပ်သူဒေသခံတဦးက "ကားနှစ်စီးနဲ့ လာဖမ်းသွားတာ။ ရဲနဲ့ စစ်သားတွေ အင်အားများတယ်။ ဖုန်းနဲ့ ပိုက်ဆံတွေပါ သိမ်းသွားပြီး အိမ်ကိုပါဖျက်ဆီးပြီး ဖမ်းဆီးသွားတယ်'' လို့ ပြောပါတယ်။
မနေ့ ညနေ ၃ နာရီခွဲလောက် နေအိမ်မှာ ရိုက်နှက်ဖမ်းဆီးခံခဲ့ရတဲ့ ကိုဇော်လင်းထက်ဟာ ခုတင် ၁၀၀ စစ်ဆေးရုံမှာ သွေးထွက်လွန်ပြီး ည ၈ နာရီဝန်းကျင်လောက်က သေဆုံးသွားခဲ့တယ်လို့ ဆေးရုံနဲ့နီးစပ်သူတွေဆီက သိရပါတယ်။
မနေ့ကနဲ့ ဒီကနေ့နေ့လယ်အထိ သေဆုံးသွားသူ ကိုဇော်လင်းထက် အပါအဝင် ဖမ်းဆီးခံရသူ မိသားစုဝင်တွေ ၄ ဦး ရှိသွားပြီလို့ ဒေသခံတွေဆီက သိရပါတယ်။
သေဆုံးသူ ကိုဇော်လင်းထက် အပါအဝင် ဖမ်းဆီးခံရသူတွေဟာ သာမန်ပြည်သူတွေဖြစ်ပြီး စစ်အာဏာရှင်ဆန့်ကျင်ရေးဆန္ဒပြပွဲတွေမှာတော့ ပါဝင်ခဲ့ဖူးကြောင်း မိသားစုနဲ့နီးစပ်သူတွေဆီက သိရပါတယ်။
