လှိုင်သာယာမြို့နယ်တွင် လူငယ် ၂ ဦး ပစ်ခတ်ဖမ်းဆီးခံရ
DVB
·
August 29, 2021
ရန်ကုန်တိုင်း၊ လှိုင်သာယာမြို့နယ်၊ အမှတ် (၂၀) ရပ်ကွက် ၈၆ ဂိတ်ဟောင်းအနီး အနော်ရထာလမ်းမကြီးမှာ သြဂုတ် ၂၈ ရက်ညနေ ၆ နာရီခွဲလောက်က စစ်ကောင်စီရဲ့ အရပ်ဝတ်လက်နက်ကိုင်တွေက လူငယ် ၂ ဦးအား ပစ်ခတ်ဖမ်းဆီးမှု ဖြစ်ခဲ့တယ်လို့ မြို့ခံတစ်ဦးက ပြောပါတယ်။
“သေနတ်ပစ်သံ ၄ ချက်လောက်ကြားလိုက်ရတယ်။ လူတွေလည်း ရုတ်ရုတ်သဲသဲဖြစ်သွားတယ်။ မကြာဘူး အရပ်ဝတ် နဲ့ လက်နက်တွေကိုင်ထားတဲ့သူတွေ တွေ့ရတယ်။ ယူနီဖောင်းတွေမဝတ်ထားဘူး အရပ်ဝတ်တွေနဲ့ပစ်ဖမ်းတာ။ လူငယ် ၂ ယောက်ကိုဖမ်းတာ။ ၂ ယောက်လုံး ဖမ်းမိသွားပြီး ၁ ယောက်ဒဏ်ရာရသွားတယ်။ ဘာလို့ဖမ်းတယ်ဆိုတာတော့ မသိဘူး” လို့ ပြောပါတယ်။
လှိုင်သာယာမြို့နယ်တွင်း သြဂုတ်လ ပထမပတ်ကစပြီး မကြာခဏ ဆိုသလို ပစ်ခတ်သံတွေ ထွက်ပေါ်နေခဲ့သလို နေ့ညမပြတ်ဖမ်းဆီးမှုတွေလည်း ပိုများလာတယ်လို့ မြို့ခံတွေက ပြောပါတယ်။
