ဧရာဝတီတိုင်း၊ ညောင်တုန်းမြို့က အောက်ဆီဂျင်အခက်အခဲရှိနေတဲ့ ကိုဗစ်လူနာတွေအတွက် ကူညီပေးနိုင်ဖို့ အောက်ဆီဂျင်ထုတ်စက်၀ယ်ယူတပ်ဆင်ဖို့ မြို့ခံပြည်သူတွေက ကိုယ်ထူကိုယ်ထ  ဆောင်ရွက်နေကြပါတယ်။

အောက်ဆီဂျင်ထုတ်စက်အတွက် စရံငွေပေးတာနဲ့ စာချုပ်ချုပ်ဆိုတာတွေကို ဇူလိုင် ၁၇ ရက် ဒီနေ့မှာ ရွှေဟင်္သာတောရကျောင်းတိုက် မနော်ဟရီတိုက်ကျောင်းမှာ နာယက ဆရာတော်ကြီးတွေရဲ့ ရှေ့မှောက် ပြုလုပ်ခဲ့ပါတယ်။ 

တစ်နာရီကို ​အောက်ဆီဂျင် ၄၀ L အိုး ၄ လုံး ထုတ်နိုင်မယ့်စက်အတွက် ကုမ္ပဏီမှ ကျွမ်းကျင်ပညာရှင်တွေက လာရောက်သင်ကြားပြသပေးမှာဖြစ်ပြီး  စက်စတင်မှာ ယူချိန်တဲ့အချိန်ကနေ တပ်ဆင်ပြီးစီးတဲ့အထိ ရက်ပေါင်း ၄၀ လောက်ကြာမြင့်မယ်လို့ ဒီအစီအစဉ်ဖြစ်မြောက်ရေး ဦးဆောင် ကမကထ ပြုလုပ်နေသူ တစ်ဦးက ပြောပါတယ်။

လက်ရှိအချိန် ​ညောင်တုန်းမြို့မှာ ​အောက်ဆီဂျင်အခက်အခဲရှိနေတဲ့ ပြည်သူတွေအတွက် တခြားနေရာကနေ သွားယူပြီး ပီတိလူမှုကူညီ​ရေးအသင်းက အခမဲ့ပြန်​ဖြန့်ဝေပေးနေတာ ဖြစ်ပါတယ်။

အောက်ဆီဂျင်ထုတ်စက်ကို ပြည်သူ​တွေ အလှူ​ငွေနဲ့ တည်​ဆောက်တာဖြစ်ပြီး မြို့ထဲမှာ စက်ရုံထားရှိမှာဖြစ်ကာခန့်မှန်းကုန်ကျငွေ ကျပ် သိန်း ၁၀၀၀ ဝန်းကျင်ရှိမယ်လို့ သိရပါတယ်။

ညောင်တုန်းမြို့မှာ ကိုဗစ်-၁၉ လူနာတွေကို ​​ညောင်တုန်း​ဆေးရုံ၊ ဆားမ​လောက်​ဆေးရုံနဲ့ ချောင်းကြီး​ဆေးရုံတွေမှာ ကု​သ​ပေး​​နေပြီး၊ လူနာတွေများတဲ့အတွက်  ​ညောင်တုန်းမြို့​တော်ခန်းမမှာ ကုသဖို့ လုပ်ဆောင်ထားတယ်လို့ သိရပါတယ်။

​ညောင်တုန်းမြို့မှာ ကိုဗစ်တတိယလှိုင်းကာလ ဇူလိုင် ၁၇ ရက်နေ့အထိ သေဆုံးသူ ၂၁ ဦးအထိရှိတယ်လို့   လူမှုကူညီ​ရေးအသင်းတွေကနေ သိပါတယ်။

ဧရာဝတီတိုင်းမြို့တော် ပုသိမ်မြို့မှာလည်း  ​အောက်ဆီဂျင်ထုတ်စက်ရုံတည်​ဆောက်နိုင်​ရေး ပြည်သူတွေ ကိုယ်ထူးကိုယ်ထ လုပ်​ဆောင်​နေ​ကြပါတယ်။

နိုင်ငံတော်အာဏာကို ဖေဖော်ဝါရီ ၁ ရက်နေ့ကစတင် မတရားသိမ်းယူခဲ့တဲ့ စစ်ကောင်စီကတော့ ပြည်သူတွေရဲ့ အောက်ဆီဂျင် လိုအပ်ချက်ကို ဖြည့်ဆည်းပေးခြင်းမရှိသလို  နိုင်ငံပိုင် စက်ရုံတွေမှာ ပြည်သူတွေ အောက်ဆီဂျင် ယူခွင့်လည်း တားဆီးပိတ်ပိတ်ထားပါတယ်။