မန္တလေးမြို့မှာ ကိုဗစ်-၁၉ ကူးစက်မှုနှုန်း မြင့်တက်လာနေတာကြောင့် ဈေးချိုတော်နဲ့ တိုက်တန်းကြီး၊ မန်းမြန်မာပလာဇာနဲ့ ရတနာပုံစျေးစတဲ့ စျေးကြီးတွေကို စည်ပင်သာယာရေးကော်မတီ ဈေးနှင့်သားသတ်ဌာနက ဇူလိုင် ၁၆ ရက်ကစတင်ပြီး ရက်အကန့်အသတ်မရှိ ယာယီပိတ်လိုက်ပါတယ်။

ကိုဗစ်တတိယလှိုင်းကာလ ပိုးတွေ့နှုန်းမြင့်တက်လာတာကြောင့် ဈေးသူ ဈေးသားတွေနဲ့ ဈေးဝယ်လာပြည်သူတွေ ကိုဗစ်-၁၉ ကူးစက်ကပ်ရောဂါဆိုးမှ ကင်းဝေးစေဖို့ အခုလို  ယာယီပိတ်သိမ်းတာလို့ ဈေးအကျိုးဆောင်အဖွဲ့ဆီက သိရပါတယ်။

အဆင့်မြင့်ဈေးချိုတော်နဲ့ တိုက်တန်းကြီး၊ မန်းမြန်မာပလာဇာနဲ့ ရတနာပုံစျေးစတဲ့ စျေးကြီးတွေကို ကိုဗစ်ကာလအတွင်း တတိယအကြိမ် ယာယီပိတ်လိုက်တာလည်း ဖြစ်ပါတယ်။

မန္တလေးမြို့မှာ ဇူလိုင် ၁၄ ရက်က ကိုဗစ်ပိုးတွေ့ရှိသူ ၇၄ ဦးရှိပြီး ကိုဗစ်-၁၉ အတည်ပြုလူနာနဲ့ သံသယရှိသူ အယောက် ၃၀ သေဆုံးခဲ့ပါတယ်။ ဇူလိုင် ၁၅ ရက်နေ့ကလည်း ကိုဗစ်-၁၉ လူနာနဲ့ သံသယလူနာ ၂၃ ဦး သေဆုံးခဲ့တယ်လို့ ပရဟိတအသင်းတွေဆီက သိရပါတယ်။ 

မန္တလေးခရိုင်အတွင်း မြို့နယ် ၇ ခုကို  Stay at Home နေအိမ်တွင်း နေထိုင်ရေး အစီအစဉ် အကြုံးဝင်ကြောင်း ဇူလိုင် ၁ ရက်က စစ်ကောင်စီ ကျန်းမာရေးနှင့် အားကစားဝန်ကြီးဌာနက ထုတ်ပြန်ထားပါတယ်။