ပြည်မြို့တွင် ကိုဗစ်-၁၉ ရောဂါကြောင့် ဆရာတော် ၁ ပါးအပါအဝင် ၄ ဦးထပ်မံသေဆုံး
DVB
·
July 9, 2021
ပဲခူးတိုင်းအနောက်ခြမ်း၊ ပြည်မြို့နယ်မှာ ကိုဗစ်-၁၉ ရောဂါကြောင့် ဆရာတော် ၁ ပါးအပါအဝင် ၄ ဦး ထပ်မံသေဆုံးတယ်လို့ သိရပါတယ်။
မနေ့ညပိုင်းမှာ ၁ ဦးသေဆုံးပြီး ဒီနေ့မနက်ပိုင်းမှာ ၃ ဦးသေဆုံးသွားတာဖြစ်ပြီး ပန်းတောင်းမြို့နယ်ကနေ ပြည်မြို့ အောင်ဆန်းကွက်သစ် တိုးချဲ့ ၅ လမ်းမှာ လာရောက်သတင်းသုံးနေတဲ့ သက်တော် ၆၄ နှစ်အရွယ် ဆရာတော် ၁ ပါးနဲ့ ကျန် ၃ ဦးကတော့ ပြည်မြို့ပေါ်ရပ်ကွက် ဆေးရေးရပ်ကွက်၊ ရုံးလမ်းက အသက် ၆၅ နှစ်အရွယ်အမျိုးသား ၁ ဦး၊ တရုတ်စုရပ်ကွက်က အသက် ၈၀ အရွယ်အမျိုးသား ၁ ဦးနဲ့ ရွှေလက်လှရပ်၊ ဝါရုံလမ်းက အသက် ၆၀ အရွယ် အမျိုးသမီး ၁ ဦးတို့ဖြစ်ကြောင်း လူမှုကူညီရေးအသင်းတွေဆီက သိရပါတယ်။
ပြည်မြို့ပေါ်မှာ ကိုဗစ်တတိယလှိုင်းကာလာ ဒီနေ့ ၄ ဦးအပါအဝင် သေဆုံးသူ ၁၄ ဦးရှိပြီး၊ ရောဂါကူးစက်ခံရသူ ၂၇၈ ဦး၊ ဆေးရုံဆင်းခွင့်ရသူ ၃၃ ဦးရှိပြီလို့ ကျန်းမာရေးဌာနက သိရပါတယ်။
