ဧရာဝတီတိုင်းဒေသကြီး၊ ဖျာပုံခရိုင်၊ အမာမြို့နယ်မှာ ဇူလိုင် ၅ ရက် ညနေပိုင်းက RDT test နဲ့ စစ်ဆေးရာမှာ ၆ ဦး ကိုဗစ်-၁၉ ရောဂါပိုး စတင်တွေ့ရှိပါတယ်။
"ကျန်းမာရေးဌာနကို အကြောင်းကြားလို့ RDT test နဲ့ စစ်ဆေးတယ်။ ဆိပ်မကျေးရွာနဲ့ ကညင်ကုန်းကျေးရွာက ကိုဗစ်-၁၉ Positive လူနာ ၆ ဦး ဇူလိုင် ၅ ရက် ညနေပိုင်းက စတင်တွေ့ရှိခဲ့တယ်” လို့ အမာမြို့နယ်ကျန်းမာရေး ဦးစီးဌာနက တာဝန်ရှိသူတစ်ဦးကပြောပါတယ်။
ကညင်ကုန်းကျေးရွာနေ အမျိုးသားတစ်ဦး နေမကောင်းဖြစ်ပြီး ကိုယ်ပူချိန်မကျလို့ ကျန်းမာရေးဌာနသို့ အကြောင်းကြားလာခဲ့ရာ ကျန်းမာရေးဌာနက RDT test kits နဲ့ စစ်ဆေးစဉ် ကိုဗစ်-၁၉ ပိုးတွေ့ခဲ့တာပါ။
ပိုးတွေ့လူနာနဲ့အတူနေမိသားစုတွေကို ဆက်လက်စစ်ဆေးရာ ဇနီးဖြစ်သူ အမက(လွန်) ကျောင်းဆရာမနဲ့ အသက် ၁၁ နှစ်အရွယ် သမီးဖြစ်သူတို့မှာလည်း ကိုဗစ်-၁၉ ရောဓါ စစ်ဆေးတွေ့ရှိခဲ့တယ်လို့ မြို့နယ်ကျန်းမာရေးဦးစီးဌာနက သိရပါတယ်။
ဆိပ်မကျေးရွာမှာလည်း ကိုဗစ်-၁၉ ပိုးတွေ့သူနဲ့ ဆက်စပ်ပြီး အတူနေမိသားစုဝင်တွေဖြစ်တဲ့ အမျိုးသား ၂ ဦးနဲ့ အမျိုးသမီး ၁ ဦးတို့ RDT test kits နဲ့ စစ်ဆေးခဲ့ရာ ကိုဗစ်-၁၉ ရောဂါပိုး တွေ့ရှိခဲ့တယ်လို့သိရပါတယ်။
ပိုးတွေ့အတည်ပြုလူနာ ၆ ဦးကို အမာမြို့ တိုက်နယ်ဆေးရုံမှာ သီးခြားထားရှိကာ လိုအပ်တဲ့ ကျန်းမာရေးစောင့်ရှောက်မှုတွေ ဆောင်ရွက်ပေးနေတယ်လို့ မြို့နယ်ကျန်းမာရေး ဦးစီးဌာနက သိရပါတယ်။
Photo- အမာ ကျန်းမာရေးဦးစီးဌာန
