ပဲခူးတိုင်း ပြည်မြို့မှာ ကိုဗစ်-၁၉ တတိယလှိုင်းကာလ သေဆုံးသူ ၇ ဦးထိ ရှိလာခဲ့ပြီလို့ ဒေသခံ လူမှုကူညီရေးအသင်းဆီက သိရပါတယ်။

ပရဟိတအဖွဲ့ဝင် တဦးက "ဇူလိုင် ၃ ရက်နေ့က စစ်ကဲလမ်းလူနာက ပထမဆုံးပေါ့၊ အဲ့မနက်ပဲ ပြည်ဆေးရုံကြီးက အတည်ပြုလူနာ ၂ ယောက်ထပ်ဆုံးတယ်။ အောင်လံမြို့က လူနာတစ်ဦး ပြည်ဆေးရုံကြီးမှာ ထပ်ပြီးသေဆုံးခဲ့လို့ အဲ့ဒီနေ့မှာပဲ သေဆုံးသူ ၄ ဦးရှိခဲ့တယ်။ ဇူလိုင် ၄ ရက်နေ့မှာတော့ ၂ ဦးနဲ့ ဇူလိုင် ၅ ရက်နေ့မှာ ၁ ဦး သေဆုံးခဲ့လို့ စုစုပေါင်း ၇ ဦးရှိပြီ” လို့ ပြောပါတယ်။

ဇူလိုင် ၅ ရက်နေ့က သေဆုံးသွားတဲ့ လူနာဟာ ရန်ကုန်မြို့မှာ ဆေးကုဖို့သွားရင်း ဆေးစစ်ကြည့်တဲ့အခါမှာ ကိုဗစ်-၁၉ ရောဂါပိုးတွေ့ရှိခဲ့တာကြောင့် ပြည်မြို့ကိုပြန်လာပြီး အိမ်မှာဆေးကုသရင်း သေဆုံးသွားခဲ့တာလို့ သိရပါတယ်။

ပဲခူးတိုင်းအနောက်ခြမ်းမှာ သာယာဝတီ၊ လက်ပံတန်းနဲ့ မင်းလှမြို့နယ်တွေကိုတော့ Stay at Home အဖြစ်သတ်မှတ်ခံထားပြီး၊ လူသေဆုံးမှုအများဆုံးက လက်ပံတန်းပြီးပါက ပြည်မြို့နယ်က ဒုတိယအများဆုံးလို့ သိရပါတယ်။