ဧရာဝတီတိုင်း၊ ဘိုကလေးမြို့နယ်မှာ အကြမ်းဖက်စစ်ကောင်စီတပ်နဲ့ ကျေးရွာအုပ်ချုပ်ရေးမှူးတချို့ ပူးပေါင်းကာ ရွာသားတွေဆီက ခြိမ်းခြောက်ငွေတောင်းနေတယ်လို့ ဒေသခံတွေက ပြောပါတယ်။

မြင်းကကုန်းကျေးရွာအုပ်ချုပ်ရေးမှူး လှမျိုးဦးက စစ်တပ်ကတပ်ကြပ်ကြီးအဆင့် စစ်သားတစ်ဦးကို  ရွာခေါ်လာကာ ခြိမ်းခြောက်ငွေတောင်းခံနေတာဖြစ်ပြီး ငွေကြေးတတ်နိုင်တဲ့အိမ်တွေဆိုရင် ကျပ် ၁ သိန်းကနေ ၅ သိန်းကြား တောင်ယူလေ့ရှိတယ်လို့ဒေသခံတွေက ပြောပါတယ်။

" ဆန္ဒပြပွဲတွေမှာ လိုက်မိတဲ့ လူတွေကို အဖမ်းမခံချင်ရင် ပိုက်ဆံ ပေးရမယ်ဆိုပြီး ပြောတယ်။ မပေးနိုင်ရင် အမှုဖွင့်ပြီး ဖမ်းမယ်ဆိုပြီး ခြိမ်းခြောက်တာတွေလုပ်တယ်''လို့ ဒေသခံတွေက ပြောပါတယ်။

ဖေ့စ်ဘွတ်ခ်လူမှုကွန်ရက်မှာ Comment ရေးမိတာကအစလိုက်ပြီး ပုဒ်မ ၅၀၅ က၊ ခ နဲ့ အမှုဖွင့်လို့ရတယ်ဆိုပြီး ခြိမ်းခြောက်ငွေတောင်းတာတွေကြောင့် မပေးနိုင်တဲ့ ရွာသားအချို့က ထွက်ပြေးနေရတယ်လို့ ဆိုပါတယ်။