ပဲခူးတိုင်းဒေသကြီး၊ ဒိုက်ဦးမြို့မှာ အကြမ်းဖက် စစ်တပ်က ပစ်ခတ်လို့ မေလ ၁၇ ရက် မနေ့ညက လူငယ်တယောက် သေနတ်ကျည်ဆန်ထိမှန် သေဆုံးခဲ့ပါတယ်။
ဒေသခံတယောက်က"မနေ့ည ၇ နာရီခွဲလောက်မှာ တပ်က သေနတ်ဖောက်တယ်။ မြို့ထဲမှာ ညပိုင်း သေနတ်ဖောက်တာ ၂ ရက်ရှိပြီ။ ဖောင်တော်သီကျေးရွာက လူငယ် ၂ ယောက် ဒိုက်ဦးကိုတက်လာကြတာ သေနတ်ဖောက်သံကြားတော့ အခု သေဆုံးတဲ့သူနေတဲ့ မြို့သစ် (ခ) ရပ်ကွက်ထဲဝင်ပြေးကြတယ်။ အဲဒါကို တပ်က လိုက်ပစ်ပြီးဖမ်းတယ်။ အဲဒီအချိန်မှာ အခုဆုံးတဲ့ ကိုကျော်မိုးက မိန်းမနဲ့ ရန်ဖြစ်ပြီး လက်ထဲမှာလည်း ဓားနဲ့ ဆဲဆိုပြီးထွက်လာတဲ့ အချိန်ကိုက်သွားတော့ သူ့ပါ ပစ်လိုက်တာ" လို့ ပြောပါတယ်။
ကိုကျော်မိုးရဲ့ လက်မောင်းနဲ့ ပေါင်မှာ ဒဏ်ရာရပြီး ဆေးရုံမရောက်ခင် သွေးလွန်ကာ ဆုံးသွားတာဖြစ်ပါတယ်။
ဒီနေ့ နေ့လယ် ၁၂ နာရီလောက်မှာ ဆေးရုံကနေ ရုပ်အလောင်းကို ပြန်ထုတ်ပေးပြီး မနက်ဖြန်မှာ မိသားစုက သင်္ဂြိုဟ်ဖို့ အစီအစဉ်ရှိပါတယ်။
သေဆုံးသွားတဲ့ အသက် ၃၀ အရွယ် ကိုကျော်မိုးမှာ ဇနီးနဲ့ ကလေး ၂ ယောက် ကျန်ခဲ့ပါတယ်။
ဖောင်တော်သီကနေ ဒိုက်ဦးကို တက်လာတဲ့ လူငယ် ၂ ယောက်ကိုလည်း စစ်တပ်က ဖမ်းဆီးသွားပါတယ်။
