နေပြည်တော်က အိမ်တော်တွေကို လုံခြုံရေးယူရတဲ့ ရဲတပ်ရင်းတခုက တပ်သားတယောက် ပြည်သူ့ဘက်က ရပ်တည်တဲ့ CDM မှာ ပူးပေါင်းပါဝင်လာပြီး ဖမ်းဆီးခံရတဲ့ သမ္မတကြီး ဦးဝင်းမြင့်ရဲ့ အခြေအနေကို ထုတ်ဖော်ပြောကြားခဲ့ပါတယ်။
ရဲတပ်ရင်း ၁၈ ဟာ နေပြည်တော်က လွှတ်တော်နဲ့ အကြီးအကဲအိမ်တော်တွေကို လုံခြုံရေး တာဝန်ယူရတဲ့ တပ်ရင်းတခုဖြစ်ပြီး ရဲတပ်သား ကိုလင်းလင်းထူး (ကိုယ်ပိုင်အမှတ် လ ၂၀၅၅၃ဝ)ဟာ ပြည်သူ့ဘက်ကနေ ရပ်တည်လာခဲ့တာပါ။
“ကိုယ့်ပြည်သူကို ကိုယ်ပြန်သတ်တာမျိုး ကျနော် မလုပ်နိုင်ဘူး။ ဒါကြောင့် တပ်ရင်းကနေ ခွင့်တင်ပြီး ထွက်လာတယ် ။ ဒီနေ့တော့ DM လုပ်တယ်ဆိုတာ ကြေညာလိုက်တယ်” လို့ တပ်သား ကိုလင်းလင်းထူးက ပြောပါတယ်။
သူဟာ ဖေဖော်ဝါရီ ၁ ရက် စစ်တပ်က အာဏာသိမ်းတဲ့နေ့အထိ ပြည်ထောင်စုလွှတ်တော်နာယကရဲ့ အိမ်တော်မှာ လုံခြုံရေးတာဝန်ယူခဲ့ရပြီး အဲဒီနေ့ ညပိုင်းမှာတော့ စစ်ကြောင်းရုံးကို ပြန်လာခဲ့ရတယ်လို့ ဆိုပါတယ်။
“နေ့လယ်မှာ ကျနော်တို့အားလုံး အဆောင်မှာ ပြန်ပြီး အိပ်နေရတယ်။ ဘာမှမလုပ်ရဘူး၊ ပြီးတော့ ပစ္စည်းတွေသိမ်းပြီး ဝ ဘုရားနား (လွှတ်တော်အဝင်ဂိတ်နား)က စစ်ကြောင်းရုံးကို သွားရတယ်။ အဲဒီမှာညအိပ်ပြီး နောက်နေ့မှာ သမ္မတဦးဝင်းမြင့်ကိုထားတဲ့ အိမ်တော်ကို သွားရတယ်”လို့ ပြောပါတယ်။
သမ္မတ ဦးဝင်းမြင့်ကို အိမ်တော်တွေထဲက တခုဖြစ်တဲ့ A 29 မှာ ထိန်းသိမ်းထားပြီး အတွင်းအပြင်မှာ စစ်သားနဲ့ ရဲတွေ စောင့်ကြပ်ထားတယ်လို့ သူက ဆိုပါတယ်။
"အိမ်တော်ထဲမှာက အကြမ်းဖက်(နှိမ်နင်းရေး)အဖွဲ့က စစ်ဝတ်စုံနဲ့လူတွေရှိတယ်။ အပြင်မှာက ကျနော်တို့တပ်ရင်းက ရဲတွေနဲ့ စစ်သားတွေ ရှိတယ်။ ကျနော်တို့ အဲဒီကိုရောက်ပြီးတော့ ကင်းမျှော်စင် ၆ ခု ဆောက်ရတယ်။ သမ္မတကြီးတို့လင်မယားက မနက်နဲ့ ညနေမှာ အိမ်ရှေ့ကိုထွက်ပြီး လမ်းလျှောက်ကြတယ်။ အဲအချိန်မှာဆို ကျနော်တို့က မျှော်စင်ပေါ်ကနေ သေချာစောင့်ကြည့်ရတယ်” လို့ သူက ပြောပါတယ်
အဲဒီအိမ်တော်ကို ထမင်းပို့ဖို့အတွက် ကားလေး ၁ စီးနဲ့ လူ ၂ ယောက်ပဲ အမြဲ ပုံမှန် ဝင်ထွက်လေ့ရှိတယ်လို့လည်း သူက ဆိုပါတယ်။
