ဧရာဝတီတိုင်း၊ ပုသိမ်မြို့မှာ မတ်လ ၂၇ ရက် ဖက်ဆစ်တော်လှန်ရေးနေ့မှာ အကြမ်းဖက်စစ်အုပ်စုလက်နက်ကိုင်တပ်တွေ ရပ်ကွက်ထဲဝင်ပစ်ခဲ့လို့ ပြည်သူ ၄ ဦးကျဆုံးခဲ့တယ်လို့ ဒေသခံ တွေက ပြောပါတယ်။
မနေ့ ည ၁၂ နာရီလောက်မှာ အကြမ်းဖက်စစ်အုပ်စုလက်နက်ကိုင်တွေက ဘူတာထိပ်ကနေ ရပ်ကွက်ထဲပစ်ခဲ့လို့ အသက် ၃၁ နှစ်အရွယ် ကိုဝသုန်စိုး ထိမှန်ကျဆုံးခဲ့သလို ညီမဖြစ်သူ ဇာလီနိုင်လည်း ဦးခေါင်း ဒဏ်ရာရခဲ့တယ်လို့ ဒေသခံတွေကပြောပါတယ်။
ကျဆုံးခဲ့တဲ့ ကိုဝသုန်စိုးနဲ့ ဒဏ်ရာရတဲ့ ဇာလီနိုင်တို့ကို အကြမ်းဖက် စစ်အုပ်စုက စစ်ကားနဲ့တင်ဆောင်သွားတာကြောင့် ခုချိန်ထိ အလောင်းပြန်မရသေးဘူးလို့ ဆိုပါတယ်။
ပုသိမ်မြို့၊ အမှတ် ၇ ရပ်ကွက် ရာမညမှာ မတ်လ ၂၇ ရက် မနက်ပိုင်းက အကြမ်းဖက်စစ်အုပ်စုရဲ့ လက်နက်ကိုင်တပ်တွေက သေနတ်နဲ့ လိုက်ပစ်လို့ ပြည်သူ ၂ ဦးကျဆုံးခဲ့ပါတယ်။
ပုသိမ်မြို့မှာ မတ်လ ၂၇ ရက်နေ့ တစ်နေ့တည်း စစ်တပ်ရဲ့ ပစ်ခတ်မှုကြောင့် ည ၈ နာရီအချိန်ထိ ကျဆုံးသူ အမျိုးသား ၃ ဦးရှိခဲ့ပြီး ကိုဝသုန်စိုးနဲ့ပါဆိုရင် စုစုပေါင်း ၄ ဦးရှိတယ်လို့ သိရပါတယ်။
အကြမ်းဖက်စစ်အုပ်စုအာဏာသိမ်းပြီးနောက်ပိုင်း ဖေဖော်ဝါရီလ ၇ ရက်နေ့ကစတင်ကာ စစ်အာဏာရှင်ဆန့်ကျင်ရေးဆန္ဒပြတာတွေပြု လုပ်ခဲ့ရာမှာ အနည်းဆုံး ၉ ကြိမ်ဖြိုခွင်းခံခဲ့ရသလို ကျဆုံးသူ အနည်းဆုံး ၆ ဦးရှိတယ်လို့ မြို့ခံတွေက ပြောပါတယ်။
