ရှမ်းပြည်နယ်(မြောက်ပိုင်း)၊ ကွတ်ခိုင်မြို့အနီးက ထင်းရှူးတောမှာ မတ်လ ၂၂ ရက် မနက်ပိုင်းက စစ်အာဏာရှင်တော်လှန်ရေး လူအင်အား ၂၀၀ လောက်ပါဝင်တဲ့ G-Z လူငယ်စစ်ကြောင်းဟာ ကြွေးကြော်သံတွေနဲ့အတူ ငြိမ်းချမ်းစွာ ဆန္ဒထုတ်ဖော်ခဲ့ပါတယ်။
ငြိမ်းချမ်းစွာဆန္ဒပြသူတွေကို ရဲနဲ့ စစ်တပ်က မျက်ရည်ယိုဗုံး၊ ရာဘာကျည်နဲ့ အင်အားသုံးအကြမ်းဖက်ပစ်ခတ်ဖြိုခွင်းတဲ့အပြင် ဆန္ဒပြအပြန်မှာ လိုက်လံဖမ်းဆီးတာတွေရှိတဲ့ အတွက် ဆန္ဒပြစစ်ကြောင်းဟာ ထိပ်တိုက်တွေ့ဆုံတာကို မပြုလုပ်ဘဲ အခုလို ထင်းရှူးတောမှာ ကြွေးကြော်သံတွေနဲ့အတူ ငြိမ်းချမ်းစွာဆန္ဒပြခဲ့တာပါ။
"စစ်အာဏာရှင်ကို အမြစ်ပြတ်ချေမှုန်းဖို့ အာဏာရှင်လုံးဝပြုတ်ကျဖို့အတွက် တော်လှန်တဲ့နေရာမှာ နေ့စဉ် သူတို့ဘက်ကအင်အားသုံးဖြိုခွင်းဖို့ ကြိုးစားတယ်။ ကျနော်တို့ဘက်ကတော့ ထိပ်တိုက်တွေ့ဆုံတာမလုပ်ဘူး။ ကျနော်တို့က ပြောက်ကျားစနစ် ဗျူဟာပြောင်းပြီး တော်လှန်ရေးအောင်မြင်တဲ့အထိ တော်လှန်သွားမယ်"လို့ ဆန္ဒပြပွဲမှာပါဝင်တဲ့ G-Z လူငယ်တစ်ဦးက ပြောပါတယ်။
မတ်လ ၁၈ ရက်နေ့က ဆန္ဒပြသပိတ်စစ်ကြောင်းကို တပ်နဲ့ရဲတွေက အင်အားသုံးအကြမ်းဖက်ပစ်ခတ်ဖြိုခွင်း ဖမ်းဆီးတဲ့အတွက် ဆန္ဒပြသူ နှစ်ဦးဖမ်းဆီးခံခဲ့ရပြီး အဲဒီနေ့မှာပဲ ပြန်လည်လွှတ်ပေးခဲ့ ပါတယ်။
Photo- မိုင်းဘဉာဏ်(ကွတ်ခိုင်)
